इटहरी ।समुदायस्तरमा स्वास्थ्य सेवालाई अझ प्रभावकारी बनाउने उद्देश्यसहित सुनसरीको इटहरीमा एकदिने प्रदेशस्तरीय सामुदायिक नर्सिङ तथा घरदैलो पैरवी कार्यक्रम सम्पन्न भएको छ। सहरसँगै ग्रामीण क्षेत्रका बासिन्दालाई नर्सिङ तथा स्वास्थ्य सेवाबारे परामर्शसहित सहज रूपमा सेवा उपलब्ध गराउने उद्देश्यले कार्यक्रम आयोजना गरिएको हो।
इटहरीस्थित होटल पाथीभरा इन्टरनेशनलमा आयोजित कार्यक्रममा कोशी प्रदेशका विभिन्न जिल्लाहरूबाट तीन दर्जनभन्दा बढीको सहभागिता रहेको थियो। उपस्थित वक्ताहरूले प्रदेशका कतिपय ग्रामीण भेगमा उपचारको अभावका कारण मानिसहरूले अकालमै ज्यान गुमाउनुपरेको र स्वास्थ्य सेवाबारे पर्याप्त जानकारी नहुनु चिन्ताको विषय भएको विचार व्यक्त गरे।
कार्यक्रमकी प्रमुख अतिथि इटहरी उपमहानगरपालिकाकी उपप्रमुख संगीता चौधरीले यस अभियानलाई निरन्तरता दिन सम्बन्धित निकायसमक्ष अनुरोध गर्दै इटहरी क्षेत्रमा सामुदायिक स्वास्थ्य सेवाले उल्लेखनीय फड्को मारेको बताइन्। नेपाल सरकारको स्वास्थ्य मन्त्रालयअन्तर्गत स्वास्थ्य सेवा विभाग, नर्सिङ तथा सामाजिक सुरक्षा महाशाखाद्वारा आयोजना गरिएको उक्त पैरवी कार्यक्रमको सहजीकरण वरिष्ठ कम्युनिटी नर्सिङ अधिकृत मीना मोतेले गरेकी थिइन्।
Discussion about this post