मदन पुरस्कारका दाबेदार स्रष्टा गुरुङलाई सगरमाथा सम्मान ( फाेटाे फिचर )

इटहरी । प्रतिष्ठित मदन पुरस्कारको ढोका दुईपटक ढक्ढक्याउन सफल आख्यानलेखक, पोखरेली स्रष्टा तीर्थ गुरुङलाई शनिबार इटहरीमा सार्वजनिक सम्मान गरिएको छ । नेपाली साहित्यमा थपिएको ऐतिहासिक आख्यान–कृति ‘हिउँको गीत’माथि विमर्श गर्न सगरमाथा साहित्य प्रतिष्ठान कोसी प्रदेश समितिद्वारा आयोजित विशेष समारोहमा गुरुङलाई सम्मान गरिएको हो ।

मिश्रामाया गुरुङको अध्यक्षता र कोसी प्रदेश प्रमुख परशुराम खापुङको मुख्य आतिथ्यमा सम्पन्न सो कार्यक्रममा ‘हिउँको गीत’लेखक गुरुङलाई दुबोको माला र सम्मानपत्र समर्पण गरिएको थियो । गुरुङ दुई उपन्यासमध्ये ‘पाठशाला’ २०७४ सालको र ‘हिउँको गीत’ २०८१ सालको मदन पुरस्कार श्रेष्ठ सूचीमा पर्न सफल भएकोमा बधाईसहित यसपटक उनी सो पुरस्कार प्राप्त गर्न सफल रहुन् भनी कामना पनि गरिएको थियो ।

‘हिउँको गीत’बारे बोल्ने क्रममा कवि तथा समीक्षक मनु मन्जिलले यो कृति २०८१ सालको मदन पुरस्कार प्राप्त गर्ने सूचीमा रहेका सात पुस्तकमध्ये सबैभन्दा अब्बल रहेको टिप्पणी गरे । उनले यदि ‘हिउँको गीत’लाई मदन पुरस्कार दिइँदैन भने पुरस्कार सिफारिस प्रक्रियामै प्रश्न उठ्ने पनि बताए ।

पद्मश्री साहित्य पुरस्कारको अन्तिम सूचीमा समेत रहेको ‘हिउँको गीत’माथि विमर्शका क्रममा कृतिमा प्रयुक्त शिल्प, भाषा र गहन विषयवस्तुबारे चर्चा गरिएको थियो । आदिवासी तमुहरूको उद्गम थलो र उद्विकास क्षेत्र मानिने क्होला सोँथार राज्यको विकास र विघटनको पृष्ठभूमिमा लेखिएको सो उपन्यासले पाठकलाई सात सय वर्षअघि पु¥याउने समीक्षकको दाबी छ ।

मनु मन्जिल, अस्मिता विष्ट र जेबी थुलुङले कृतिमाथि समीक्षात्मक विचार प्रस्तुत गरेको सो कार्यक्रममा समूहगत बहस सत्रको सहजीकरण अमित थेबेले गरेका थिए । कार्यक्रममा चन्द्र गुरुङ, डम्बर गुरुङ, सुविद गुरागाईँ, अभिमन्यु अभिजितलगायतले स्रष्टा र कृतिका बारेमा बोलेका थिए ।

 प्रतिष्ठानका नेपाल संरक्षक जिपी तिवारीद्वारा संस्था स्थापनादेखि हालसम्मका गतिविधि चर्चा गरिएको कार्यक्रममा राष्ट्रगानपछि सगरमाथा गान बजाएर सम्मान व्यक्त गरिएको थियो । गुरुङ समुदायको इतिहास, जीवन, संस्कृति र सङ्घर्षको जीवन्त चित्रण ‘हिउँको गीत’बारे गरिएको विमर्श सुन्न सुनसरी, मोरङ, झापा, धनकुटा र उदयपुरका डेढ सयभन्दा बढीको उपस्थिति रहेको थियो ।

स्रष्टाहरू बद्रीविशाल पोखरेल, भरत गुरागाईं बर्बरिक, छवि वैरागी घिमिरे, बद्री भिखारी, चन्द्र सम्बाहाम्फे, मीना श्रेष्ठ, हेमन यात्री, देवान किराँती, टीका आत्रेय, मदनराज बराल, केशु विरही, रमेश निरौला, राज आशातीत, केपी घिमिरे, विनोद विवश घिमिरे, पुरन याक्खा, प्रिन्स प्रमोद ढकाल, रोमु अधिकारी, तिला लेकाली, परिक्रमा श्रेष्ठ, श्रीप्रसाद पोखरेल, रामप्रसाद खरेल, मुना आत्रेय, पुष्पा सायरा, जिबी गजल, राजु केसी, विवेक विवश रेग्मी, राज माङ्लक, हेमसागर पोखरेल, धनजित पराजुली, निरज कोइराला, दिलीप राई सगर, सोनु जयन्ती, प्रज्ज्वल पराजुली, जेबी खत्री, टीका मिलन, प्रकाश भट्टराई, गीताप्रसाद श्रेष्ठ, एकराज भट्टराई, गीता कुलुङलगायतको उपस्थितिले कार्यक्रमको गरिमा बढाएको थियो ।
कार्यक्रम आस्था स्कुल, विमलस्मृति पुस्तकालय, माली किचन, अष्टाङ्ग आयुर्वेद प्राकृतिक चिकित्सा, एरिना टेलिभिजन, तमु ह्युल छोंज धीं गुरुङ राष्ट्रिय परिषद्, गुरुङ महिला राष्ट्रिय परिषद्लगायतको सहकार्यमा सम्पन्न भएको थियो ।