झाँक्रीलाई माफी मगाउने नेकपा एसको प्रयास, घनश्यामको तारन्तर फोन

काठमाडाैं । नेकपा एसकी नेतृ रामकुमारी झाँक्रीमाथि हुने भनिएको कारवाही कहाँ पुग्यो ? सर्वत्र जिज्ञासा छ । तर, एक सातादेखि जारी पार्टी सचिवालय बैठकले अहिलेसम्म उनीबारे केही निर्णय गरेको छैन ।

असार १४ गते लुम्बिनीमा आयोजित युवा संघको भेलामा उनले पार्टी अध्यक्ष तथा पूर्वप्रधानमन्त्री माधवकुमार नेपालमाथि भ्रष्टाचार मुद्दा लागेका कारण उनले पार्टी नेतृत्वबाट बाहिरिनुपर्ने र शीघ्र (अर्ली) महाधिवेशनबाट अर्को नेतृत्व चयन हुनुपर्ने अभिव्यक्ति दिएकी थिइन् ।

यो कुराले गत साता बजार राम्रैसँग गर्मायो । पार्टीमा बर्खास्ती र चेतावनीमध्ये कुन तहको कारवाही गर्ने विषय उठ्यो । तर, अहिलेसम्म केही निर्णय भएको छैन ।बैठकको पहिलो दिन झाँक्री आफैँ पार्टी कार्यालय पुगेर आफूमाथि कारवाही हुनेलगायतका विषय मिडियाबाट सुनेको भन्दै एउटा पत्र बुझाइन् । उनले आफूलाई कोही, कसैले हालसम्म कुनै स्पष्टीकरण नसोधेको भनिन् ।

२४ पदाधिकारी रहेको उक्त पार्टीको सचिवालय बैठकमा आइतबार सबै नेताले आ-आफ्ना कुरा राख्ने क्रम सकियो । मंगलबार बस्ने गरी बैठक स्थगित भयो ।बैठकमा सहभागी एक नेताले बताएअनुसार, पदाधिकारीमध्ये उनलाई पार्टीबाट निश्कासन गर्नुपर्छ भन्ने पक्षको बहुमत छ ।तर, केही नेताले पार्टीमाथिको चौतर्फी घेराबन्दी र विपक्षीको बढ्दो प्रहारलाई ख्याल गरेर सकेसम्म उनीजत्तिकी नेतृ पार्टीबाहिर हुने स्थिति नरहोस् भन्ने कोणबाट कुरा उठाए । त्यसपछि स्वयं झाँक्रीसँग कुरा गर्न एक दिनका लागि समय लिइएको हो ।

तर, सोमबार दिनभर झाँक्री पार्टी कार्यालयमा देखिइनन् । उनीसँग पार्टी नेतृत्वले एकचोटि कुरा गर्ने, यदि उनले बोलेको कुरामा माफ मागेमा चेतावनीबाहेकका कारवाही नगर्ने सहमतिमा मंगलबार बस्ने गरी आइतबारको बैठक स्थगित भएको थियो ।आइतबारको बैठकमा भएको सहमतिबमोजिम झाँक्रीसँग छलफल गर्न महासचिव घनश्याम भुसालले सोमबार दिउँसो पटक पटक उनलाई फोन सम्पर्कको प्रयास गरे । नेपाल प्रेससँग कुरा गर्दै झाँक्रीले भनिन्, ‘म दिनभरि एउटा काममा व्यस्त थिएँ, घनश्याम दाइको धेरैचोटि फोन आएको रहेछ, अब बेलुकी भेट्ने कुरा भएको छ ।’

‘के तपाईं माफ माग्दै हुनुहुन्छ ?’ भन्ने प्रश्नको जवाफमा उनले भनिन्, ‘जे भनौँला, पार्टी नेतृत्वसँगै भनौँला, त्यसपछि केही भन्नु परे तपाईंहरुसँग पनि कुरा गरौँला ।’ उनले पार्टी बैठकले गर्ने निर्णयपछि मात्रै सार्वजनिक अभिव्यक्ति दिने बताइन् ।झाँक्रीनिकट एक नेताका अनुसार उनी माफ माग्ने पक्षमा छैनन् । बैठकमा धारणा राख्ने नेतामध्ये कतिपयले अध्यक्ष नेपालमाथि भ्रष्टाचार मुद्दा लाग्दासमेत पदीय जिम्मेवारीबाट अलग हुन नचाहेको कुरामाथि नै आपत्ति जनाएका थिए ।

आइतबार बैठकमा सहभागी एक नेताका अनुसार सम्मानित नेता झलनाथ खनालले अदालतमा मुद्दा विचाराधीन रहेको अवस्थामा उक्त मुद्दाको फैसला नआउन्जेल अध्यक्षले जिम्मेवारीबाट केही समय निस्कृय नहुनु गल्ती भएको औँल्याएका थिए ।‘मुद्दा दर्ता हुनासाथ कार्यकारी जिम्मेवारीबाट हटिदिएको भए न रामकुमारीले केही बोल्ने कुरा आउँथ्यो, न त अरुले केही भन्थे’, खनालको भनाइ उद्घृत गर्दै स्रोतले भन्यो, ‘रामकुमारीले कहाँ, कुन ठाउँमा कसरी त्यस्तो कुरा बोल्नुभयो भन्ने कुरा बुझौँ र उहाँलाई आइन्दा पार्टीको कुरा पार्टीमै राख्ने गरी कुरा गरौँ ।’

बैठकका वक्तामध्ये उपाध्यक्ष जयन्ती राई, भानुभक्त जोशी, प्रकाश ज्वाला, महासचिव घनश्याम भुसाल, सचिव सावित्री भुसालले निश्कासनको तहमा पुग्न नहुने धारणा राखेका थिए ।अध्यक्ष नेपालसहित वरिष्ठ नेता प्रमेश हमाल, बेदुराम भुसाल, वरिष्ठ उपाध्यक्ष राजेन्द्र पाण्डे, डा.गंगालाल तुलाधर, जगन्नाथ खतिवडा, उपमहासचिव रामकुमार भट्टराई, मेटमणि चौधरी, राजेन्द्र राई, गरिमा शाह, सोमप्रसाद पाण्डेलगायतका पदाधिकारीले उनलाई तत्कालै पार्टीबाट बर्खास्त गर्नुपर्ने धारणा राखेका थिए ।