इटहरी ।मोरङको मिक्लाजुङ गाउँपालिकामा बंगुरको चारो खोज्न जंगल गएकी १४ वर्षीया बालिका बलात्कार भएको घटना सार्वजनिक भएको छ। ती बालिकाको गर्भ बसेपछि घटना सार्वजनिक भएको हो।

घटना बाहिरिएसँगै प्रहरीले एक जनालाई पक्राउ गरेर अनुसन्धान अघि बढाएको छ। बलात्कार आरोप लागेका मिक्लाजुङ गाउँपालिका–४ का ४४ वर्षीय छविराज चाम्लिङ राई भने फरार छन्। उनको खोजी भइरहेको प्रहरीले जनाएको छ।

मोरङ प्रहरी प्रमुख एसपी शान्तिराज कोइरालाका अनुसार चार महिनाअघि बालिकालाई राईले बलात्कार गरेको खुलेको छ। बंगुरलाई चारो खोज्न बालिका जंगल पुगेका बेला राईले नियन्त्रणमा लिएर २०७८ माघ २६ गते बलात्कार गरेको खुलेको मोरङ प्रहरीले जनाएको छ।

प्रहरीका अनुसार घटना बाहिर ल्याएमा र कसैलाई सुनाएमा मारिदिनेसम्मको धम्की दिएको बालिकाले परिवारलाई बताएकी छन्। बालिकाका बुबाले आरोपित राईविरुद्ध प्रहरीमा किटानी जाहेरी दिइसकेका छन्। बालिकाको पेटमा रहेको गर्भ राईको हो कि होइन भनेर थप यकिन गर्न प्रहरीले डीएनए परीक्षणको प्रक्रिया अघि बढाएको छ।

बलात्कारमा संलग्न भनिएका राईविरुद्ध जबरजस्ती करणी मुद्दा चलाउनलाई अनुसन्धान अघि बढाइएको प्रहरीले जनाएको छ।

बालिका अचानक बिरामी परेपछि उपचारका लागि अस्पतालमा लग्दा गर्भ रहेको खुलेको हो। स्वास्थ्य परीक्षण गराउँदा ४ महिनाको गर्भ रहेको पत्ता लागेको मोरङ प्रहरीले जनाएको छ।