इटहरी । नेपाल प्रिमियर लिग (एनपीएल) मा आज (बिहीबार) कुशल भुर्तेल र सन्दीप लामिछाने आमने सामने हुँदैछन् । अंक तालिकाको पुछारमा रहेका विराटनगर किंग्स र पोखरा एभेन्जर्सले आज एनपीएलको आफ्नो पाँचौं खेल खेल्दै छन् ।

त्रिवि क्रिकेट मैदानमा बिहान ९ बजेबाट खेल सुरू हुनेछ । दुवै टिमलाई प्लेअफको सम्भावना कायमै राख्न जित्नै पर्ने दबाब छ । विराटनगर र पोखराबीचको प्रतिस्पर्धाबाट एनपीएलबाट बाहिरिने अर्को टोलीको टुंगो लाग्नेछ । यसअघि बुधबार लुम्बिनी लायन्स प्लेअफ नपुग्ने निश्चित भइसकेको छ । चार खेलमा मात्र एकमा जित हात पारेको भुर्तेलको टिम पोखरा दुई अंकका साथ तालिकाको सातौं स्थानमा छ ।

सुरूआती दुई खेल हारेको पोखराले तेस्रो खेलमा आएर अंकको खाता खोलेको थियो । तर अघिल्लो खेलमा कर्णाली याक्ससँग सात विकेटले पराजित भएपछि पुन दबाबमा आएको छ । जारी प्रतियोगितामा एक खेलमा बाहेक पोखराको ब्याटिङ चलिरहेको छैन । भुर्तेल आफैं खराब फर्ममा छन् । उनले तीन खेलमा मात्र १६ रन जोडेका छन् । ओपनर देव खनालबाट पनि अपेक्षाकृत प्रदर्शन हुन सकेको छैन ।

दुई अंक नै जोडेको विराटनगर तालिकाको सबैभन्दा पुछारमा छ । विराटनगरले पनि यसअघि कर्णाली याक्ससँग नै खेलेको थियो । सो खेलमा प्रतीश जीसीले उत्कृष्ट बलिङ गर्दै चार विकेट लिँदा कर्णाली १३३ रनमा समेटिएको थियो । तर ब्याटिङमा कमजोर हुँदा विराटनगरले १२६ रन मात्र बनाउन सक्यो । विराटनगरका लागि मार्टिन गप्टिल, लोकेश बम, आकिब इलियास निकलस क्रितनको ब्याट चल्न आवश्यक छ । सन्दीपले पनि आफ्नो बलिङबाट टिमलाई सहयोग पुर्‍याउन सकेका छैनन् । चार खेलमा सन्दीपले मात्र एक विकेट लिएका छन् । विराटनगरले एनपीएलका बाँकी खेलका लागि नेदरल्यान्डसका कप्तान स्कट एडवार्डलाई ल्याएको छ ।