धनुषा । धनुषामा १८ वर्षीय एक युवकको बीभत्स हत्या गरिएको घटनामा उनकी प्रेमिका र परिवारका दुई सदस्य पक्राउ परेका छन्। जिल्ला प्रहरी कार्यालय धनुषाले पत्रकार सम्मेलनमार्फत घटनाको विस्तृत विवरण सार्वजनिक गरेको हो।फागुन १४ गते अपराह्न करिब ४ बजे औरही गाउँपालिका–६, चक्करस्थित भित्री सडकखण्डभन्दा करिब ३०० मिटर पूर्व मसुरी खेतमा घाँटी रेटिएको अवस्थामा एक युवकको शव फेला परेको थियो।
मृतकको पहिचान हंसपुर नगरपालिका–९, बुदौल (रुदौली)का १८ वर्षीय सुमितकुमार मण्डलका रूपमा भएको प्रहरीले जनाएको छ। उनी सगरमाथा माध्यमिक विद्यालयमा कक्षा–११ मा अध्ययनरत थिए।
प्रहरीको प्रारम्भिक अनुसन्धानअनुसार सुमित र हंसपुर नगरपालिका–६, सोनिगाकी १७ वर्षीया काजलकुमारी मण्डलबीच करिब एक वर्षदेखि प्रेम सम्बन्ध रहेको थियो। फागुन १३ गते साँझ काजलले घरमा कोही नभएको बेला सुमितलाई भेट्न बोलाएकी थिइन्। त्यस क्रममा परिवारका सदस्यले उनीहरूलाई आपत्तिजनक अवस्थामा फेला पारेपछि विवाद भएको थियो।
धनुषाका प्रहरी उपरीक्षक (एसपी) रुग्मबहादुर कुँवरका अनुसार, त्यसपछि सुमितलाई नियन्त्रणमा लिई काजलका दाजु २० वर्षीय दीपेशकुमार मण्डल र काकाका छोरा २९ वर्षीय परमेश्वर मण्डलले भैँसी बाँध्ने डोरीले हात पछाडि बाँधेका थिए। उनीहरूलाई आफ्नै मोटरसाइकलमा राखेर घरदेखि करिब डेढ किलोमिटर टाढा मानव बस्ती नभएको मसुरी खेतमा लगिएको र त्यहाँ धारिलो हतियार (खुकुरी/दाउ) प्रहार गरी घाँटी रेटेर हत्या गरिएको प्रहरीले जनाएको छ।
हत्यापछि प्रमाण लुकाउन सुमितको मोटरसाइकल विदेह नगरपालिका–१ स्थित एक साथीको घरमा लुकाएर राखिएको थियो। प्रहरीले मोटरसाइकल, प्रयोग गरिएको धारिलो हतियार र हात बाँध्न प्रयोग गरिएको डोरी बरामद गरेको जनाएको छ।घटनामा संलग्न आरोपमा काजलकुमारी मण्डल, दीपेशकुमार मण्डल र परमेश्वर मण्डल पक्राउ परेका छन्। उनीहरूमाथि कर्तव्य ज्यान मुद्दामा अनुसन्धान भइरहेको प्रहरीले जनाएको छ।
पत्रकार सम्मेलनमा एसपी कुँवरले भने, ‘हामीले घटनाको जानकारी पाउनेबित्तिकै टोली परिचालन गरेर अनुसन्धान सुरु गरेका थियौँ । प्रेम सम्बन्धकै कारण रिसइबी साधेर योजनाबद्ध रूपमा हत्या गरिएको देखिन्छ । अभियुक्तहरूले सुरुमा घटना लुकाउन खोजे पनि प्राविधिक र स्थलगत अनुसन्धानबाट उनीहरूलाई पक्राउ गर्न सफल भएका छौँ ।’
Discussion about this post