उदयपुर । उदयपुरमा घरमा आगो लाग्दा दुई जनाको मृत्यु भएको घटनामा अन्दाजी ६३ लाख रुपैयाँ बराबरको धनमाल जलेर नस्ट भएको छ।चौदण्डिगढी नगरपालिका- ७ बेल्टारमा गएराति करिब सवा ३ बजेतिरबाट सुरु भएको आगलागीमा परी २ जनाको मृत्यु भएको जिल्ला प्रहरी कार्यालय उदयपुरले जनाएको छ।
मृत्यु हुनेमा स्थानीय ७० वर्षीय लक्ष्मी नारायण खड्का र उनका ३० वर्षीय नाती पवन खड्का रहेका जिल्ला प्रहरी कार्यालय उदयपुरका प्रमुख एसपी राजन चापागाईंले जानकारी दिए।बेल्टारबजारस्थित शान्तिचोकका रवि कुमार दास र पदम खड्काको घरमा बिजुलिको तार सर्ट भएर आगलागी सुरु भएको हो। मृतकद्वय पदम खड्काका बुवा र छोरा हुन्।
राति सुतिरहेको अवस्थामा एक्कासी आगलागी हुँदा जलेर दुवैको मृत्यु भएको प्रहरीले जनाएको छ। आगलागीमा परी अस्मिता खड्का घाइते भएकी छन्। उनको नगर अस्पताल बेल्टारमा उपचार भइरहेको छ।त्रियुगा नगरपालिका र चौदण्डीगढी नगरपालिकाको दमकल, स्थानीयवासी र प्रहरीले मंगलबार बिहान आगो नियन्त्रणमा लिएका छन्।
आगलागीबाट रबिन कुमार दासको काठको घर र किराना पसलसमेत जल्दा अन्दाजी २० लाख रुपैयाँ बराबरको क्षति भएको प्रहरीले जनाएको छ। त्यसैगरि पदम खड्काको घर र चौपाया (२ वटा खसी) समेत जल्दा करिब ३१ लाख रुपैयाँ बराबरको क्षति भएको छ।
त्यसैगरि पदम खड्काकै घरमा सञ्चालन हुँदै आएको मित्र थापा मगरको स्टेशनरी पसल जल्दा करिब ६ लाख, होमबहादुर परियारको ट्रेलर जल्दा करिब २ लाख, मैया पौडेलको चटपटे पसल र अन्य सामानहरू जल्दा अन्दाजी ४ लाख रुपैयाँ बराबरको क्षति भएको प्रहरीले जनाएको छ।
घटनाको जानकारी प्राप्त हुना साथ प्रहरी नायव उपरीक्षक निरन्जन थापाको कमाण्डमा प्रहरी टोली खटिएको थियो। प्रहरीसहितका सुरक्षाकर्मी, दमकल र स्थानीयको सहयोगमा मंगलबार बिहान ५ः३५ बजे आगो पूर्णरुपमा नियन्त्रणमा आएको छ। मृतक लक्ष्मी नारायण खड्का र पवन खड्काको शव पोस्टमार्टमको लागि नगर अस्पताल बेल्टारको सव गृहमा राखिएको छ।
Discussion about this post