इटहरी । सत्ता साझेदार दुई दलका सांसदहरूलाई आज (मंगलबार) अकस्मात सिंहदरबार बोलाइएको छ । सबैभन्दा ठूलो पार्टी नेपाली कांग्रेसका सांसदलाई संसदीय दलको कार्यालयमा उपस्थित हुन भनिएको छ ।
दोस्रो ठूलो तथा सत्ताको नेतृत्वकर्ता दल नेकपा (एमाले) का सांसदलाई पनि मंगलबारै सिंहदरबारमा बोलाइएको छ । उनीहरूलाई पनि संसदीय दलको कार्यालयमा उपस्थित हुन भनिएको हो । दुवै दलका सांसदले आफूहरूलाई सिंहदरबारमा बोलाइएको बताएका छन् । यसबारे विस्तृत जानकारी गराइएको छैन । दुवै दलका कार्यालयबाट कारण नखुलाई दुई–तीन घण्टाभित्र संसदीय दलको कार्यालयमा उपस्थित हुन निर्देशनसहित फोन गरिएको हो ।
कांग्रेस र एमालेका सांसदले आफूहरूलाई अनिवार्य उपस्थित हुन भन्दै फोन आएको जानकारी दिएका छन् । एमाले सांसद ठाकुर गैरेले साढे १० बजे संसदीय दलको कार्यालयका बोलाएको जानकारी दिए । ‘साढे १० बजे बैठक छ भनेर बोलाइएको छ,’ ठाकुरले सुनाए, ‘म त पाल्पातिर छु । तर किन हो भनेर खुलाइएको छैन ।’
कांग्रेसका एक सांसदले पनि १० बजेदेखि २–३ बजेसम्म संसदीय दलको कार्यालयमा आउन फोन आएको जानकारी दिए । ‘आकस्मिकरूपमा सिंहदरबारस्थित संसदीय दलको कार्यालयमा १० बजेपछि २–३ बजेसम्म आउनु भनेर बोलाइएको छ ।’
कांग्रेसका अर्का एक सांसदले हस्ताक्षर संकलनको लागि बोलाइएको जानकारी दिए । ‘हस्ताक्षर संकलनको लागि भनेर बोलाइएको जस्तो संकेत बुझेका छौं,’ एक सांसदले भने, ‘उपसभामुख इन्दिरा रानाविरुद्ध पद अनुसार आचरण नगरेको भन्दै हटाउन हस्ताक्षर गराउन खोजिएको भन्ने चर्चा सांसदबीच छ ।’ कारण नखुलाएपछि बोलाइएपछि केही सांसदले कांग्रेसका प्रमुख सचेतक श्याम घिमिरेसँग बुझेका थिए । उनले पनि हस्ताक्षर संकलन उपसभामुख इन्दिरा रानालाई हटाउने संकेत स्वरूप गर्न लागेको बताए ।
‘उहाँले प्रष्ट त भन्नु भएन । तर उपसभामुखलाई हटाउन हस्ताक्षर संकलन गर्न खोजिए जस्तो संकेत गर्नुभयो,’ कांग्रेसका एक सांसदले भने । उपसभामुखको लेटरहेड दुरुपयोग गरेर केही नेपालीलाई अमेरिका लैजान दूतावासलाई पत्र लेखेपछि रानालाई पदबाट हटाउनु पर्ने आवाज उठेको थियो ।
Discussion about this post