काठमाडौं । सत्तारुढ नेपाली कांग्रेसका नेता डा. शेखर कोइरालाले कांग्रेसभित्र सभापतिबाटै गुट फस्टाउने काम भएको आरोप लगाएका छन् । कृष्णप्रसाद भट्टराईको १०१ औं जन्म जयन्तीको अवसरमा आयोजित कार्यक्रमलाई सम्बोधन गर्दै नेता कोइरालाले यस्तो बताएका हुन् ।

नेता कोइरालाले भने, ‘अहिलेको आदरणीय सभापति देउवा किसुनजीको अनुयायी हो । गुटलाई फस्टाइ दिने काम नै उहाँले गरिसकेपछि अनि अफ्ठ्यारो परिस्थिति सिर्जना हुँदोरहेछ । अहिले जसरी देशको राजनीतिक परिस्थिति अगाडि बढेको छ । त्यो राजनीतिक परिस्थिति किसुनजीहरू भएको भए के गर्नुहुन्थ्यो भन्ने लाग्छ । बीपी, गणेशमान र अरु नेताहरू भएको भए के गर्नु हुन्थ्यो ।’

आफूलाई भागबण्डामा लागेको आरोप लागे पनि पार्टी सभापतिले सबै नेताहरूको कुरा नसुनेपछि बाध्य हुन परेको जिकिर गरे । नेता शेखर कोइरालाले सभापति शेरबहादुर देउवालाई लक्ष्य गर्दै केही कुरा नसुन्ने हो भने अप्ठेरो पर्ने बताए । ‘अहिले पार्टीमा विचलन छ, हामीले स्वीकार्नु पर्छ । शेखर पनि भागबण्डामा लागेको कुरा यहाँ आयो, ६०–४० को भागबण्डा । भागबण्डा भनेर चुप लागेर बस्ने त होइन नि !’ ‘सभापतिले केही पनि सुन्दै नसुन्ने हो भने अप्ठेरोमा पर्छ । राजनीति गर्नेहरूलाई अप्ठेरो पर्छ, यो हामीले बुझ्न जरूरी छ ।’