इटहरी | मकालु इङ्लिस बोर्डिङ स्कुल, इटहरीले २०८१ सालको माध्यमिक शिक्षा परीक्षा (SEE) मा जिपिए ४.० प्राप्त गरेका ३१ जना विद्यार्थीलाई एक विशेष दीक्षान्त समारोहका बीच सम्मान गरेको छ।
कार्यक्रमको प्रमुख आतिथ्य शिक्षा विकास तथा समन्वय इकाई, सुनसरीका प्रमुख देवेन्द्र बहादुर मल्लले गरेका थिए। मल्लले विद्यालयको उत्कृष्ट नतिजा विद्यार्थीको निरन्तर मेहनतकै फल भएको स्पष्ट पार्दै मेहनत अनुसारको परिणाम प्राप्त हुने बताए।
कार्यक्रममा शिक्षाविद् तथा पूर्व जिल्ला शिक्षा अधिकारी सुवर्ण बहादुर थापाले यस्ता प्रेरणादायी कार्यक्रमहरूले विद्यार्थीहरूको आत्मबल र मनोबल दुवै बढाउने उल्लेख गर्दै, संस्कृति र संस्कारको संरक्षणमा पनि विद्यालयले अग्रणी भूमिका खेल्नुपर्ने बताए।
पूर्व कृषि तथा राज्यमन्त्री रामकुमारी चौधरीले विद्यालय परिवारको समर्पण र निरन्तर प्रयासले यस्तो उत्कृष्ट नतिजा सम्भव भएको बताइन्। त्यस्तै एनप्याब्सन सुनसरीका सल्लाहकार नारायण सन्जेलले संस्थागत विद्यालयहरूले यस वर्ष पनि सामुदायिक विद्यालयको तुलनामा उत्कृष्ट नतिजा हासिल गरेको जानकारी दिए।
सुनसरी प्याब्सनका उपाध्यक्ष गणेश भण्डारी र इटहरी नगर प्याब्सनका अध्यक्षले पनि मकालु स्कुल लगायत सम्पूर्ण संस्थागत विद्यालयहरूको नतिजा उत्कृष्ट हुनुमा विद्यालय, अभिभावक, शिक्षक र विद्यार्थीको सामूहिक लगाव मुख्य कारण रहेको बताए।
कार्यक्रमको अध्यक्षता गर्दै विद्यालयका प्रधानाध्यापक **थानेश्वर ढकाल ‘नेल्शन’**ले मकालु विद्यालय विगत वर्षहरूदेखि नै इटहरी क्षेत्रमा उत्कृष्ट नतिजा ल्याउने संस्थाको रूपमा स्थापित भएको बताए। उनले आगामी वर्षहरूमा पनि यस्तै नतिजा ल्याउने विश्वास व्यक्त गरे।
कार्यक्रममा विद्यालय व्यवस्थापन समिति अध्यक्ष रञ्जना शर्माले स्वागत मन्तव्य दिइन् भने संस्थापक अध्यक्ष चिन्तामणि पौडेलले विद्यालय हरेक दृष्टिकोणले उत्कृष्ट रहेको धारणा राखे।
दीक्षान्त समारोहमा जिपिए ४.० प्राप्त गर्ने विद्यार्थी मिसु प्रधान, साथै अष्टिका थापा र सफलता गिरीले विद्यालयमा अध्ययन गर्दा प्राप्त ज्ञान, सीप र अनुभवहरूले आफ्नो जीवनलाई सफल बनाउन सहयोग पुग्ने विश्वास व्यक्त गरे।
कार्यक्रममा विद्यार्थीहरूले नृत्य लगायतका सांस्कृतिक कार्यक्रम पनि प्रस्तुत गरेका थिए। कार्यक्रमको सञ्चालन विद्यालयका सहायक प्रधानाध्यापक मणि पौडेलले गरेका थिए।
Discussion about this post