इटहरी। सुनसरीको इटहरी–२ आयुर्वेदिक टोलस्थित त्रिनेत्र अध्यात्म चिन्तन केन्द्र परिसरमा स्थापित त्रिनेत्र मोक्षधामको आइतबार औपचारिक समुद्घाटन गरिएको छ। कोशी प्रदेशका पर्यटन, वन तथा वातावरण मन्त्री भीम पराजुलीले उक्त धामको समुद्घाटन गरेका हुन्। शिवरात्रिको पावन अवसरमा मन्त्री पराजुलीको हातबाट सो धामको भव्य उद्घाटन गरिएको १०८ शिवलिङ्ग निर्माण समितिका संयोजक बाबुराम सुवेदीले जानकारी दिए। मन्त्री पराजुलीले धाम परिसरमा स्थापित १०८ शिवलिङ्गमा जल अर्पण गर्दै उद्घाटन गरेका हुन्।
कार्यक्रमका प्रमुख अतिथि समेत रहेका मन्त्री पराजुलीले धर्मले मानिसमा सकारात्मक विचार ल्याउने र सो विचारले नै काम गर्ने ऊर्जा प्रदान गर्ने बताए। उनले कुनै पनि काम योजना बनाएर गरे समयमै सम्पन्न गर्न सकिने ज्वलन्त उदाहरण यो कार्यक्रमले दिएको उल्लेख गरे। पराजुलीले गत भदौमा प्रदेशसभा सदस्य रहँदा नै त्रिनेत्र अध्यात्म चिन्तन केन्द्रमा १०८ शिवलिङ्गको शिलान्यास गरेका थिए।
सांसद हुँदा शिलान्यास गरेको शिवलिङ्ग अहिले निर्माण सम्पन्न भई मोक्षधाम नामकरण गरी पुनः उद्घाटन गर्न पाउँदा आफूलाई भाग्यमानी ठानेको पनि बताए। यस धामले कोशी प्रदेशको पर्यटकीय क्षेत्रमा नयाँ आयाम थपेको बताउँदै भविष्यमा यो स्थल धार्मिक पर्यटकीय गन्तव्य बन्ने उद्घोष गरे।
कार्यक्रममा धामका पीठाधीश महेश्वरानन्द केशर पुरी महाराजले मोक्षधाममा स्थापित १०८ शिवलिङ्ग स्थललाई सबै मिलेर संरक्षण गर्नुपर्नेमा जोड दिए। कार्यक्रमकी सभाध्यक्ष सुभद्रा प्याकुरेलले संकल्प गरेअनुसार छोटो समयमा यो क्षेत्रलाई धार्मिक पर्यटकीय स्थलको रूपमा चिनाउन सफल भएको उल्लेख गरिन्। उनले १०८ शिवलिङ्ग स्थापना गर्दा विभिन्न समस्या र चुनौतीको सामना गर्दै अन्ततः ठूलो सफलता हात पारेको बताइन्।
अध्यक्ष प्याकुरेलले वैदिक सनातन धर्मको संरक्षण तथा आध्यात्मिक चेतनाको प्रवर्द्धनमार्फत समाजमा आन्तरिक जागरण र सकारात्मक सोच विकास गर्ने उद्देश्यसहित इटहरीको आयुर्वेदिक टोलमा त्रिनेत्र अध्यात्म चिन्तन केन्द्रको कोशी प्रदेश कार्यालय स्थापना गरी सोही केन्द्रको संकल्पमा १०८ शिवलिङ्ग निर्माण गरेर धार्मिक गतिविधि र चहलपहल बढाएको बताइन्।
कार्यक्रममा त्रिनेत्र अध्यात्म चिन्तन केन्द्रका केनद्रिय पदाधिकारी , सुनसरी अध्यक्ष सुशसला सिटाैला (अाचार्य ) काेशी प्रदेश सांसद मिना श्रेष्ठ , केन्द्रका काेशी प्रदेश उपाध्यक्ष हिरा अाचार्य , इटहरी उपमहानगर ९ का वडाध्यक्ष जितेन्द्र थापा लगायतकाे उपस्थिती रहेकाे थियाे ।
यसैबीच शिवरात्रिको अवसर पारेर त्रिनेत्र मोक्षधाममा आइतबार ३५०० भन्दा बढी दर्शनार्थीहरूले सो परिसरमा स्थापित १०८ शिवलिङ्गमा जल चढाएका छन्। शिवरात्रिको अवसरमा बिहानैदेखि भक्तजनहरूको घुइँचो लागेको र दिउँसो २ बजेसम्म ३५०० भन्दा बढी भक्तजनहरूले उपस्थिति जनाई शिवलिङ्गमा जल अर्पण गरेको १०८ शिवलिङ्ग निर्माण समितिका संयोजक बाबुराम सुवेदीले बताए।
Discussion about this post