इटहरी । लगातारको वर्षासँगै आएको बाढीले कोशी लोकमार्गको केही सडक खण्डमा क्षति पुर्याएपछि यातायात अवरुद्ध भएको छ ।आज (शनिबार) बिहान करिब साढे ५ बजे लेउती खोलामा आएको बाढीले कोशी लोकमार्गको धनकुटा साँगुरीगढी गाउँपालिका–६ फेदी भन्ने स्थानमा सडक बगाएपछि यातायात अवरुद्ध भएको हो । वर्षासँगै आएको बाढी र पहिरोका कारण धनकुटाको साँगुरीगढी गाउँपालिका–६ मा सडक कटान भएको छ । सडक कटान भएसँगै लोकमार्गका दुई स्थानमा सडक पूर्णरूपमा अवरुद्ध भएको प्रहरीले जनाएको छ ।
जिल्ला प्रहरी कार्यालय धनकुटाका अनुसार फेदी नजिकैको लेउती खोलामा अचानक आएको बाढीले करिब एक सय मिटर सडक कटान गरेपछि दुवैतर्फको सवारी आवागमन पूर्ण रूपमा ठप्प भएको छ । सोही सडकको नमस्ते झरनाको छेउमा माथिबाट खसेको पहिरोले पनि पूर्ण रूपमा सडक अवरुद्ध भएको छ । सडक खुलाउन प्रहरी र नेपाली सेनाको टोली खटिएको छ । अहिले अवरोध हटाउने कार्य भइरहेको प्रहरीले जनाएको छ ।
कोशी प्रदेशमा अति भारी वर्षा, सतर्कता अपनाउन आग्रह
काठमाडौं । मनसुन प्रवेश गरेसँग कोशी प्रदेशमा भारीदेखि अति भारीसम्म वर्षा भएको मौसम पूर्वानुमान महाशाखाले जनाएको छ । कोशी प्रदेशमा बिहीबार रातिदेखि मनसुनी वायु वहन थालेको हो । त्यसयता त्यहाँ वर्षा हुने क्रम ह्वात्तै बढेको छ ।
पछिल्लो १२ घण्टामा कोशी प्रदेशका केही स्थानमा धेरै भारीदेखि अति भारीसम्म वर्षा भएको मौसम महाशाखाले जनाएको छ । अहिले शनिबार बिहान कोशी, मधेस, बागमती र गण्डकी प्रदेशका धेरै स्थान तथा लुम्बिनी, कर्णाली र सुदूरपश्चिम प्रदेशका एक–दुई स्थानमा मेघगर्जन, चट्याङसहितको हल्कादेखि मध्यम पानी परिरहेको छ ।
महाशाखाले आज बिहान ६ः३५ बजे चेतावनी जारी गर्दै भनेको छ, ‘पछिल्लो १२ घण्टामा कोशी प्रदेशका केही स्थानहरूमा धेरै भारीदेखि अति भारी वर्षा भएको छ । पानी पार्ने प्रणाली उत्तरतिर सरिरहेको र थप पानी पर्न सक्ने सम्भावना रहेकाले आवश्यक सतर्कता अपनाउनु होला ।’
यसैबीच बाढी पूर्वानुमान महाशाखाले पनि आज (शनिबार) बिहान ६ बजे छुट्टै सूचना जारी गरी भनेको छ, ‘हाल इलाम, झापा, मोरङ, सुनसरी र धनकुटाका धेरै स्थानमा भारी वर्षा भएको छ र थप वर्षा हुने सम्भावना छ। मेची, विरिङ, निन्दा, कन्काई, चिसाङ खोला, मावा–रतुवा, लोहन्द्रा, बक्राहा, नुनखोलालगायत अन्य साना खोलामा सतर्कता तहआसपास बाढी आउन सक्छ, दिउँसोसम्म उच्च सतर्कता अपनाऔं ।’
मौसमविद्का अनुसार २४ घण्टामा १० मिलिमिटरभन्दा कम पानी पर्नु हल्का वर्षा, १० देखि ५० मिलिमिटरसम्म पानी पर्नु मध्यम वर्षा, ५० देखि माथि १०० मिलिमिटरसम्म पानी पर्नु भारी वर्षा, १०० देखि माथि २०० मिलिमिटरसम्म पानी पर्नु धेरै भारी वर्षा र २०० मिलिमिटरभन्दा माथि पानी पर्नु अति भारी वर्षा हो । यस्तै केही स्थानमा वर्षा भन्नाले सम्बन्धित भूभागको ५० प्रतिशत, थोरै स्थान भन्नाले २५ देखि ३० प्रतिशत र एक–दुई स्थान भन्नाले २५ प्रतिशतभन्दा कम ठाउँमा वर्षा हुन्छ भनेर बुझ्न सकिने मौसमविद् बताउँछन् ।
Discussion about this post