झापा । झापाको दमकमा रहेको मालपोत र नापी कार्यालय आगजनी हुनबाट कर्मचारीहरुले जोगाएका छन् ।नापी कार्यालय दमकका सर्वेक्षक नारायण सापकोटासहितका कर्मचारीहरुले आन्दोलनकारीलाई सम्झाएर फर्काउँदै नापी र मालपोत कार्यालय आगजनी हुनबाट जोगाएका हुन् ।
जेनजी आन्दोलनका क्रममा दुई वटा अराजक समूहले मालपोत र नापीमा आगजनीको प्रयास गरेका थिए । २–३ जनाको समूहले सुरुमा मालपोत कार्यालयमा लगाएको आगो स्थानीयको सहयोगमा कर्मचारीले नियन्त्रणमा लिए । फेरि आएको अर्काे समूहले मालपोत कार्यालयमा तोडफोड गर्दै आगजनीको प्रयास गरे ।
आगजनीका लागि कार्यालय प्रवेश गरेकाहरूलाई आफू नै आन्दोलनकारीजस्तो बनेर सम्झाउँदै कार्यालयबाट बाहिर निकालेको उनले बताए ।‘अराजक समूहलाई रोक्न आन्दोलनकारीकै रूपमा प्रस्तुत भइयो,’ सापकोटाले भने, ‘सबै भ्रष्टलाई कारवाही गर्नुपर्छ, तर यो कागजातले हामीलाई नोक्सान गर्दैन, सधैंका लागि चाहिन्छ भन्दै सम्झाएँ । यो प्रयासले कार्यालय जोगियो ।’
ललितपुर घर भएका उनी पाँच महिनाअघि दमक सरुवा भएर आएका थिए ।जेनजी युवाहरुको प्रदर्शनको क्रममा दमकका सबैजसो सरकारी कार्यालयहरु आगजनी हुँदा मालपोत र नापी कार्यालय जोगिएका छन् ।‘कार्यालय आगलागी हुनबाट जोगाउन सर्भेक्षक नारायण सापकोटा, अमर राई र स्थानीयको भूमिका महत्वपूर्ण थियो,’ मालपोत कार्यालय दमक शाखा प्रमुख लक्ष्मीप्रसाद खरेलले भने, ‘कार्यालयका फर्निचर र उपकरणमा क्षति भए पनि आगजनी हुन पाएन ।’
Discussion about this post