इटहरीः सुनसरीको इटहरी उपमहानगरपालिका ६ मा गठबन्धनका तर्फबाट वडाध्यक्ष पदको उम्मेदवार बनेका दिवस पोख्रेलले उद्योग वाणिज्य संघ इटहरीको अध्यक्षको रुपमा आफूले गर्न नसकेका कामहरु जनप्रतिनिधि बनेपछि सम्पन्न गर्ने बताएका छन् ।

इटहरीलाई व्यावसायिक हिसाबले सबल बनाउन आफूले उम्मेदवारी दिएको उनको भनाइ छ । “एक पसल दुई फुल, टेङ्ग्रा खोलामा पर्यटकीय पुल” भन्ने नाराका साथ उनी चुनावी अभियानमा छन् । दातृ निकायबाट सहयोग मागेर भएपनि पार्किङव्यवस्थापनलाई चुस्तदुरुस्त पारिने बताउँदै उनले शहरको अत्यावश्यक आवश्यकताका रुपमा रहेको सार्वजनिक शौचालय निर्माणलाई प्राथमिकताका साथ सम्पन्न गर्ने उल्लेख गरे ।

सडक विभागको सहयोगमा बजारबाट बग्ने पुराना पैनीहरुलाई व्यवस्थित गरी बजारको ढललाई व्यवस्थित बनाई स्वच्छ वातावरण सुनिश्चित गर्ने आफ्नो योजना रहेको पनि पोख्रेलले सुनाए । पोख्रेलसँगै उनको समूहमा खुल्ला महिला सदस्यमा रमला तामाङ, दलीत महिला सदस्य मीना रसाइली, खुल्ला सदस्यमा दलबहादुर प्रधान (दिनेश) र नवीन तामाङ चुनावी दौडमा होमिएका छन् । नेकपा एमालेका उमेश पौडेल र राप्रपाका अनिल सुब्बा पोख्रेलका प्रतिद्वन्द्वी उम्मेदवारहरु हुन् ।