धादिङ दुर्घटना: थप २ जनाको मृत्यु, मृतकको संख्या १९ पुग्यो

धादिङ । पृथ्वी राजमार्ग अन्तर्गत धादिङको बेनिघाट रोराङ गाउँपालिका–७ चरौंदी नजिकै गएराति भएको बस दुर्घटनामा घाइते भएकामध्ये थप दुईजनाको मृत्यु भएको छ। जिल्ला प्रहरी कार्यालय धादिङका अनुसार१ महिला र १ पुरुष विदेशी नागरिकको उपचारको क्रममा मृत्यु भएको हो। योसँगै दुर्घटनामा ज्यान गुमाउनेको संख्या १९ पुगेको छ।

आइतबार साँझ पोखराबाट काठमाडौँका लागि छुटेको ग.२ ख १४२१ नम्बरको बस गएराति १ बजेतिर त्रिशूली नदी किनारमा खसेको थियो। दुर्घटनामा घाइते भएकाहरुको धादिङ र काठमाडौँका विभिन्न अस्पतालमा उपचार भइरहेको जिल्ला प्रहरी कार्यालय धादिङले जनाएको छ। मृतकको अझै सनाखत हुन सकेको छैन। घाइते २८ जनाको परिचय भने खुलेको प्रहरीले जनाएको छ।