इटहरी । पछिल्लो समय नेपालमा चर्चित अनुहारको नाममा फेक आइडी बनाउने र त्यसको माध्यमबाट ठगी गर्ने गिरोह सक्रिय भएपछि ‘फेक एकान्ट’का असली पात्रलाई तनाव भएको छ ।
उनीहरूको फेक एकाउन्टबाट पैसा माग्ने काम भएको भन्दै सक्कली एकान्टबाट उक्त कार्य आफूबाट नहुने भएकोले सचेत रहन आग्रहहरू आउन थालेको छ । आफूले यस्तो कार्य नगर्ने र यसबाट सचेत रहनु भन्दै गायिका एलिना चौहान, रचना रिमाल र रेखा पोखरेलले फेसबुक स्टाटस पोस्ट गर्दै आपत्ति जनाएका छन् ।
उनीहरूले आफ्नो नाम र फोटो प्रयोग गरेर फेक आइडी बनाई ठगी गर्ने गिरोह सक्रिय रहेको भन्दै सचेत रहनसमेत आग्रह गरेका छन् । आफूहरूको नाममा आइडी खोलेर जेनजी आन्दोलनका क्रममा घाइते भएकाहरूलाई सहयोग गर्ने भन्दै पैसा मागिएको भन्दै फेसबुकमा आपत्ति जनाउदै सचेत रहन आग्रह गरेका हुन् ।
जेनजी आन्दोलनबाट घाइते भएका र आर्थिक रूपमा कमजोर भएकाहरूलाई सहयोग गर्ने भन्दै कलाकारहरूको नामबाट फेक आइडी बनाउने क्रम बढेपछि सक्कली अनुहारलाई तनाव भएको हो । सामाजिक सञ्जालमा पैसा मागिएको एसएमएसको स्क्रिनशट शेयर गर्दै सचेत रहन आग्रह गरेका हुन् । साथै उनीहरूले आफूबाट यस्तो माग्ने कार्य नहुने पनि बताएका छन् ।
नेपालमा फेसबुक, भाबर, वाट्सएपलगायतका माध्यमबाट ठगी हुने क्रम बढ्दो क्रममा रहेको हुँदा प्रहरीले सबैलाई सचेत रहन अनुरोध गरेको छ । साइबर ब्युरोका प्रवक्ता तथा प्रहरी उपरीक्षक दीपकराज अवस्थी भन्छन्,’यस प्रकारका कार्य नितान्त अपराध भएको हुँदा कानुनी रूपमा प्रहरीले गर्ने अनुसन्धान र कारबाही छदैँछ । तर कलाकार तथा चर्चित मान्छेले किन पैसा माग्छन् भनेर हामी पनि सचेत रहनुपर्छ ।’
Discussion about this post