इटहरी । प्रतिनिधि सभा निर्वाचनको प्रत्यक्षतर्फका सबै निर्वाचन क्षेत्रको नतिजा सार्वजनिक भइसकेको छ भने समानुपातिकतर्फको मतगणना पनि अन्तिम चरणमा पुगेको छ।
प्रत्यक्षतर्फ राष्ट्रिय स्वतन्त्र पार्टी (रास्वपा)ले सबैभन्दा धेरै १२५ सिट जितेको छ। नेपाली कांग्रेसले १८, नेकपा (एमाले)ले ९, नेकपाले ७, श्रम संस्कृति पार्टीले ३ र राष्ट्रिय प्रजातन्त्र पार्टी (राप्रपा)ले १ सिट जितेका छन्। एक स्वतन्त्र उम्मेदवार पनि निर्वाचित भएका छन्।
समानुपातिकतर्फ मंगलबार अपराह्न पौने ४ बजेसम्म १ करोड ५ लाख १४ हजार २५८ मत गणना भइसकेको छ। जसमध्ये रास्वपाले सबैभन्दा धेरै ५० लाख ४० हजार ५२२ मत प्राप्त गरेको छ।
त्यस्तै, नेपाली कांग्रेसले १७ लाख ७ हजार ७३४, नेकपा (एमाले)ले १४ लाख २४ हजार ४२८, नेकपाले ७ लाख ७६ हजार ४२८, श्रम संस्कृति पार्टीले ३ लाख ६५ हजार ४०६ र राप्रपाले ३ लाख २६ हजार ६०२ मत पाएका छन्। अन्य दलले भने ३ प्रतिशतको ‘थ्रेसहोल्ड’ पार गर्न नसक्ने देखिएको छ।
यस आधारमा समानुपातिकतर्फ ६ दलले मात्र सिट पाउने भएका छन्। प्रारम्भिक अनुमान अनुसार रास्वपाले ५८, कांग्रेसले १९, एमालेले १७, नेकपाले ९, श्रम संस्कृतिले ४ र राप्रपाले ४ सिट पाउने देखिएको छ।
प्रत्यक्ष र समानुपातिक दुवै तर्फको सिट जोड्दा प्रतिनिधि सभामा रास्वपाका १८३, कांग्रेसका ३७, एमालेका २५, नेकपाका १७, श्रम संस्कृतिका ७ र राप्रपाका ५ सिट हुने देखिएको छ।२७५ सदस्यीय प्रतिनिधि सभामा दुईतिहाइ बहुमतका लागि १८४ सिट आवश्यक पर्छ।
Discussion about this post