इटहरी। सङ्खुवासभाको मकालु गाउँपालिका वडा नं. ५ र वडा नं. २ जोड्ने बेलिब्रिज भाँचिएको छ भने ट्रक अरुण नदीमा खसेको छ।शनिबार मकालु-५ को नुम र वडा नं. २ को सेदुवा जोड्ने अरुण नदीमा निर्माण गरिएको बेलिब्रिज भाँचिएको हो। सिमेन्ट बोकेको ट्रक तार्ने क्रममा बेलिब्रिज भाँचिएको जिल्ला प्रहरी कार्यालय, सङ्खुवासभाका प्रहरी नायब उपरीक्षक कुमारप्रसाद मैनालीले बताए।
ठूला सवारीसाधन तार्ने क्रममा पुल गाडीसहित भाँचिएको हो। बेलिब्रिज भाचिँदा नुम सेदुवा सडकखण्डको भित्री सडकमा प्रदेश-०३-००१ क २९२० नम्बर ट्रक अरुण नदीमा खसेको छ। ट्रक नदीमा खसेर दुर्घटनामा हुँदा सिन्धुपाल्चोक बाह्रबिसे नगरपालिका-९ का ४० वर्षीय अर्जुन श्रेष्ठ गम्भीर घाइते भएको प्रहरी नायब उपरीक्षक मैनालीले जानकारी दिए। घाइते चालकको प्राथमिक स्वास्थ्य केन्द्र नुममा उपचारपश्चात् काठमाडौँ लैजाने तयारी भइरहेको उनले बताए।
निर्माणाधीन कासुवा हाइड्रो पावर कम्पनीको निर्माण सामग्री लिएर गएको लोवेट ट्रक पुल भाँचिएपछि अरुण नदीमा खसेको हो। अरुण नदीको बेलिब्रिज भाँचिएपछि नुम-सेदुवा सडकखण्ड पूर्ण रूपमा अवरुद्ध भएको छ भने आवतजावत ठप्प बनेको छ। यसमार्ग हुँदै मकालु बेसक्याम्प जानेआउने गरिन्छ। पुल भत्किँदा स्थानीय बासिन्दा, पर्यटक तथा दैनिक उपभोग्य सामग्री ढुवानीमा प्रत्यक्ष असर परेको छ। पुल मर्मत तथा वैकल्पिक व्यवस्था मिलाउन समन्वय भइरहेको जनाइएको छ। विशेषगरी कासुवा हाइड्रोपावरसँग मर्मतसम्भारका विषयमा छलफल भइरहेको जिल्ला प्रहरी कार्यालयले जनाएको छ।
Discussion about this post