इटहरी । प्रतिनिधिसभा निर्वाचन २०८२ नजिकिँदै जाँदा काठमाडौँ क्षेत्र नं ९ फेरि एकपटक राजनीतिक बहसको केन्द्रमा परेको छ। पुरानो नेवार बस्ती, मध्यमवर्गीय मतदाता, विस्तारिँदो सहरी बसोबास र वैकल्पिक राजनीतिक धारप्रतिको आकर्षणका कारण यो क्षेत्र परम्परागत रूपमा प्रतिस्पर्धी मानिन्छ।
यस क्षेत्रमा ३४ मतदानस्थल र ९० मतदान केन्द्र छन्। कूल ७८ हजार ४९५ मतदाता रहेकामा ३८ हजार २१७ पुरुष र ४० हजार २७८ महिला छन्। १८ दल र छ स्वतन्त्र गरी २४ उम्मेदवार मैदानमा छन्, जसमध्ये २० पुरुष र चार महिला हुन्। उम्मेदवारमध्ये ४१.६७ प्रतिशत खस आर्य, ५४.१७ प्रतिशत आदिवासी जनजाति र ४.१७ प्रतिशत दलित समुदायका छन्।
काठमाडौँ महानगरपालिका वडा नं १२, १४, २१, २२, चन्द्रागिरि नगरपालिका १, १२, १३, १४, १५ तथा नागार्जुन नगरपालिका ६, ७, ८, ९, १० यो क्षेत्रमा पर्छन्।
प्रायः सबै उम्मेदवारले सुशासन, भ्रष्टाचार नियन्त्रण, पारदर्शी सेवा प्रवाह र व्यवस्थित विकासलाई प्राथमिक एजेन्डा बनाएका छन्। ट्राफिक व्यवस्थापन, ढल तथा फोहर सुधार, हरित क्षेत्र संरक्षण, पर्यटन प्रवर्द्धन, युवालाई रोजगारी, प्राविधिक शिक्षा र सहज स्वास्थ्य सेवामा समान प्रतिबद्धता देखिन्छ। धार्मिक तथा सांस्कृतिक सम्पदाको संरक्षण पनि साझा विषय बनेको छ।
कांग्रेसकी बास्तोलाको योजना
नेपाली कांग्रेसकी उम्मेदवार नानुमैया बास्तोलाले पार्टीको विशेष महाधिवेशनपछि उत्साह थपिएको बताउँदै भनिन्, ‘नेपाली कांग्रेसको विशेष महाधिवेशनपछि नयाँ नेतृत्वको उत्साह छ । युवा पुस्ता र महिलाको प्रतिनिधित्व बढेको छ । म यही क्षेत्रकी स्थायी बासिन्दा हुँ, यहाँका जनभावना बुझेको छु, जनताका आवाज सुनेको छु, अब तिनलाई कानुनमार्फत सम्बोधन गर्ने समय आएको छ’।
कलङ्की–थानकोट नाका रहेको क्षेत्र भएकाले ट्राफिक व्यवस्थापनलाई पहिलो प्राथमिकता दिएको उनले बताइन्। ‘कलङ्की–थानकोट नाका देशकै प्रमुख प्रवेशद्वार हो । ट्राफिक व्यवस्थापन, भूमिगत तार विस्तार, व्यवस्थित सडक, ढल र फोहर व्यवस्थापन नगरी यहाँको विकास सम्भव छैन । कानुन बनाउन नै संसद् जाने हो, विकास र समृद्धिका लागि स्पष्ट ब्लु–प्रिन्ट लिएर म चुनावमा उत्रिएकी छु’, उनले भनिन्।
चन्द्रागिरि–१ लाई पर्यटकीय क्षेत्रका रूपमा विकास गर्ने, नेवा समुदायका धार्मिक संरचना जोगाउने र ‘हेरिटेज वाक’ सञ्चालन गर्ने योजना पनि उनले सार्वजनिक गरेकी छन्।
रास्वपाका अर्यालको जोड : समावेशी विकास
राष्ट्रिय स्वतन्त्र पार्टीका उम्मेदवार डोलप्रसाद अर्याल (डिपी) समावेशी र सुशासित क्षेत्र बनाउने प्रतिबद्धतासहित चुनावी अभियानमा छन्। महिला, दलित, अपाङ्गता भएका व्यक्ति तथा अल्पसङ्ख्यक समुदायका लागि सेवा सुधारलाई उनले प्राथमिकतामा राखेका छन्।
उनका एजेन्डामा पुरानो नैकाप खेलमैदान स्तरोन्नति, नयाँ खेल संरचना, स्टार्टअप प्रवर्द्धन, व्यावसायिक तालिम केन्द्र स्थापना, पर्यटन क्षेत्र संरक्षण तथा टुरिस्ट सटल बस सञ्चालन समावेश छन्। भ्रष्टाचारविरुद्ध शून्य सहनशीलता, प्रत्येक वडामा खबरदारी टोली गठन र मासिक सार्वजनिक सुनुवाइमार्फत गुनासो समाधान गर्ने योजना उनले अघि सारेका छन्।
एमालेका शाक्यको प्रतिबद्धता
नेपाल कम्युनिष्ट पार्टी (एमाले) का उम्मेदवार डा अजयक्रान्ति शाक्यले उम्मेदवारीलाई दीर्घ राजनीतिक अनुभव र प्राज्ञिक योगदानसँग जोड्दै प्रस्तुत गरेका छन्। ‘बहुजन हिताय, बहुजन सुखाय, सर्वप्रकारेण जगत हिताय’को भावनाबाट प्रेरित भई जनसेवामा केन्द्रित रहने उनले बताए।
‘म जे गर्न सक्छु, त्यही मात्र बोल्छु । जनप्रतिनिधि रहँदा वा नरहँदा पनि समाजसेवा र अध्ययन–अनुसन्धानमै समर्पित रहँदै आएको छु’, उनले भने। सांस्कृतिक सम्पदा संरक्षण, प्रविधिमैत्री सुशासन र योजनाबद्ध सहरीकरण उनका मुख्य प्राथमिकता हुन्।
अन्य दल र स्वतन्त्र उम्मेदवार
नेपाल कम्युनिष्ट पार्टीका राधाकृष्ण महर्जन, राष्ट्रिय प्रजातन्त्र पार्टीका दिलकुमार कार्की, राष्ट्रिय जनमोर्चाका रोशन दानी, नेपाल कम्युनिष्ट पार्टी (संयुक्त) का एन्जिसराज प्रसाई, नेपाल मजदुर किसान पार्टीका शान्त महर्जन, मङ्गोल नेशनल अर्गनाइजेसनका धर्मराज गुरुङ, मितेरी पार्टी नेपालका मदन पोखरेल, जनता समाजवादी पार्टी नेपालका रणवीर क्षेत्री सिंहलगायत उम्मेदवार प्रतिस्पर्धामा छन्।
यसैगरी आमजनता पार्टीका ईरस श्रेष्ठ, प्रगतिशील लोकतान्त्रिक पार्टीका राजु रोक्का, जय मातृभूमि पार्टीका अनुपमुनि बज्राचार्य, श्रम संस्कृति पार्टीका बलराम श्रेष्ठ, नेकपा (माओवादी) का माइला लामा, उज्यालो नेपाल पार्टीका रामेश्वर श्रेष्ठ र राष्ट्रिय मुक्ति पार्टी नेपालका मदन डङ्गोल चुनावी मैदानमा छन्। स्वतन्त्रतर्फ पञ्चकुमारी मानन्धर सबैभन्दा ज्येष्ठ उम्मेदवारका रूपमा छन् भने अन्य स्वतन्त्र उम्मेदवार पनि प्रतिस्पर्धामा छन्।
अघिल्लो नतिजा
अघिल्लो निर्वाचनमा नेकपा (एमाले) का कृष्णगोपाल श्रेष्ठ ११ हजार ९५६ मतसहित विजयी भएका थिए। राष्ट्रिय स्वतन्त्र पार्टीका टेकबहादुर पोखरेल १० हजार ९५६ मतसहित दोस्रो स्थानमा थिए। अन्य दल र स्वतन्त्र उम्मेदवारले पनि उल्लेख्य मत प्राप्त गरेका थिए।यसपटक काठमाडौँ–९ मा पुराना दलप्रतिको असन्तोष, नयाँ दलप्रतिको अपेक्षा र स्वतन्त्र उम्मेदवारको उपस्थितिले प्रतिस्पर्धा थप रोचक बनेको छ। अन्तिम परिणामले स्थानीय मात्र नभई राष्ट्रिय राजनीतिलाई समेत सन्देश दिने आकलन गरिएको छ।
Discussion about this post