इटहरी । निर्वाचन आयोगले फागुन २१ गते हुने प्रतिनिधि सभा सदस्य निर्वाचनलाई लक्षित गर्दै सवारीसाधन प्रयोगलाई कानुनी दायराभित्र राख्न ‘सवारीसाधनको अनुमतिसम्बन्धी कार्यविधि, २०८२’ लागू गरेको छ। आयोगका प्रवक्ता नारायणप्रसाद भट्टराईका अनुसार प्रचारप्रसार र मतदानको दिन सवारी सञ्चालनलाई व्यवस्थित र नियन्त्रणयोग्य बनाउन कार्यविधि जारी गरिएको हो । निर्वाचन आयोग ऐन, २०७३ ले दिएको अधिकार प्रयोग गरी यो व्यवस्था कार्यान्वयनमा ल्याइएको जनाइएको छ ।
कार्यविधिअनुसार प्रतिनिधि सभा सदस्यका उम्मेदवारले प्रचार अवधिमा अधिकतम दुईवटा दुई पाङ्ग्रे, तीन पाङ्ग्रे वा हलुका चार पाङ्ग्रे सवारी मात्र प्रयोग गर्न पाउनेछन् । मोटर चल्ने सवारी सम्भव नभएका क्षेत्रमा एक उम्मेदवारले बढीमा चारवटा घोडा प्रयोग गर्न सक्ने व्यवस्था छ ।निर्वाचन प्रयोजनका लागि सवारी सञ्चालन गर्नुअघि सम्बन्धित निर्वाचन अधिकृतबाट अनिवार्य अनुमति लिनुपर्नेछ। तोकिएको ढाँचामा निवेदन दिएर स्वीकृति प्राप्त नगरी सवारी चलाउन पाइने छैन ।
मौन अवधि सुरु भएपछि प्रचारका लागि सवारी सञ्चालन पूर्ण रूपमा निषेध हुनेछ। मतदान हुनुभन्दा ४८ घण्टा अघिदेखि मतदान प्रक्रिया सम्पन्न नहुँदासम्म प्रचारात्मक सवारी चलाउन नपाइनेछ। मतदानको दिन आयोगबाट स्वीकृत सवारीबाहेक अन्य सवारी सञ्चालनमा रोक लगाइनेछ, हवाई उडान भने प्रतिबन्धमुक्त रहनेछ।
प्रचारका क्रममा विदेशी नम्बर प्लेट भएका सवारी प्रयोगमा पूर्ण प्रतिबन्ध लगाइएको छ। उल्लंघन भएमा सवारी जफत गरिने र निर्वाचन सम्पन्न भएपछि मात्र फिर्ता गरिने आयोगले जनाएको छ। जिल्ला आचारसंहिता अनुगमन समितिलाई अनुगमनका क्रममा आवश्यक निर्देशन दिन सक्ने अधिकार दिइएको छ।
मतदानको दिन उम्मेदवार, सुरक्षाकर्मी, संवैधानिक निकायका पदाधिकारी, राष्ट्रिय सूचना आयोग, निर्वाचन पर्यवेक्षक, कूटनीतिक नियोग, संयुक्त राष्ट्रसंघसम्बद्ध निकाय, सञ्चार माध्यम, अध्यागमन तथा भन्सार कार्यालय, विदेशी पर्यटक, अन्तर्राष्ट्रिय संघ–संस्था, अवलोकनकर्ता, विशिष्ट अतिथि तथा आयोगले तोकेका अन्य व्यक्ति वा निकायले अनुमति लिएर सवारी प्रयोग गर्न सक्नेछन्।
एम्बुलेन्स, दमकल, शववाहन, अस्पताल सेवा, खानेपानी ट्यांकर, दूध ढुवानी, दूरसञ्चार र विद्युत् सेवाजस्ता अत्यावश्यक सेवाका सवारीलाई अनुमति आवश्यक नपर्ने स्पष्ट गरिएको छ। कूटनीतिक नियोगका सिडी नम्बर प्लेट भएका सवारीमा पनि यही व्यवस्था लागू हुनेछ।
Discussion about this post