लहान । लहानस्थित प्रादेशिक अस्पतालमा परीक्षणका लागि राखिएको एक किशोरीको शव अर्कै परिवारले लिएर अन्त्येष्टि गरेको गम्भीर लापरबाहीको घटना सार्वजनिक भएको छ।
गोलबजार नगरपालिका–३ जम्दहकी १६ वर्षीया निशा बानियाँको शव ‘पोस्टमार्टम’का लागि अस्पतालमा राखिएको भए पनि अस्पताल प्रशासनले झुक्किएर अर्कै परिवारलाई शव बुझाएको खुलेको हो। गत शनिबार आत्महत्या गरेको भनिएकी बानियाँको शव अस्पतालमा राखिएको थियो।
घटनाअनुसार, रोजगारीको सिलसिलामा विगत दुई वर्षदेखि भारतको मुम्बईमा रहेका मृतकका आमाबुवा छोरीको मृत्युको खबर पाएलगत्तै नेपाल फर्किएका थिए। सोमबार बिहान छोरीको अन्तिम संस्कारका लागि अस्पताल पुग्दा शव नपाएपछि घटना बाहिर आएको हो।
अस्पताल प्रशासनसँग बुझ्दा सोही समयमा सप्तरीकी समान उमेरकी अर्की किशोरीको शव पनि परीक्षणका लागि अस्पतालमा राखिएको खुल्यो। प्रहरीका अनुसार ती किशोरीका परिवारले आइतबार झुक्किएर निशा बानियाँको शव लिएर अन्त्येष्टिसमेत गरिसकेका छन्।
अस्पतालका मेडिकल सुपरिटेन्डेन्ट डा. रञ्जित झाले शव व्यवस्थापनका क्रममा ‘कोडिङ’ नगर्दा कर्मचारीबाट गम्भीर गल्ती भएको स्वीकार गरेका छन्। “यो अस्पताल प्रशासनको गम्भीर लापरबाही हो, छानबिन गरेर दोषीलाई कारबाही गरिन्छ,” उनले भने।
छोरीको अन्तिम पटक मुखसमेत देख्न नपाएपछि मृतकका बुबा पूर्णबहादुर बानियाँ भावविह्वल बनेका छन्। “छोरीलाई जोगाउन सकिएन, सास हुँदा देख्न पनि पाइएन। कम्तीमा लास त देख्न पाइएला भनेर विदेशबाट आयौँ, तर अस्पतालको लापरबाहीले त्यो पनि सम्भव भएन,” उनले पीडा व्यक्त गरे।
शव हराएको विरोधमा आक्रोशित आफन्त र स्थानीयले इलाका प्रहरी कार्यालय गोलबजार घेराउ गर्नुका साथै लहान अस्पताल परिसरमा विरोध प्रदर्शन गरेका छन्। उनीहरूले पूर्व–पश्चिम राजमार्गसमेत अवरुद्ध गर्दै दोषीलाई कारबाही र पीडितलाई न्याय दिन माग गरेका छन्।
इलाका प्रहरी कार्यालय लहानका प्रमुख प्रहरी नायब उपरीक्षक कैलाश राईका अनुसार पीडित परिवार, अस्पताल प्रशासन र सरोकारवालाबीच वार्ताको तयारी भइरहेको छ। घटनाबारे थप अनुसन्धान जारी रहेको प्रहरीले जनाएको छ।
Discussion about this post