इटहरी । नेपाल कम्युनिष्ट पार्टी (एमाले) ले सुनसरी क्षेत्र नं. २ बाट युवा नेता सुजन लामालाई प्रतिनिधि सभा निर्वाचनका लागि उम्मेदवार बनाएको छ। विगतमा एमालेले जित निकाल्दै आएको यस क्षेत्रमा पार्टी संगठन मजबुत रहेको दाबी गर्दै यसपटक पनि उत्साहित देखिएको छ।
कोशी प्रदेश युवा संघका संयोजकसमेत रहेका लामाको यो पहिलो संसदीय निर्वाचन हो। आफूलाई “थोरै बोल्ने, धेरै काम गर्ने” उम्मेदवारका रूपमा प्रस्तुत गर्दै उनी युवा र नयाँ पुस्ताको प्रतिनिधित्व गर्ने दाबी गर्छन्।
अघिल्ला चुनावबाट उत्साहित एमाले
२०७९ सालको निर्वाचनमा एमालेका भीम आचार्यले ३२ हजार २४ मत ल्याएर विजयी भएका थिए। उनका निकटतम प्रतिद्वन्द्वी नेपाली काँग्रेसका रामप्रसाद महतोले २६ हजार ६८ मत प्राप्त गरेका थिए। पहिलो पटक चुनाव लडेका राष्ट्रिय स्वतन्त्र पार्टीका लालविक्रम थापाले १९ हजार ३९१ मत ल्याउँदै तेस्रो स्थान हासिल गरेका थिए भने राप्रपाले ४ हजार २६९ मत पाएको थियो।
यसअघि २०७४ सालमा भने नेपाली काँग्रेसका सीताराम महतोले ४१ हजार ४९५ मत ल्याएर जित हात पारेका थिए। एमालेको समर्थनमा उठेका माओवादी केन्द्रका डम्मरु सुवेदीले ३५ हजार ३४९ मत ल्याएका थिए।त्यसभन्दा अघिल्लो निर्वाचनमा एमालेका धर्म निरौलाले यस क्षेत्रबाट जित हात पारेका थिए।
स्थानीय तहमा दह्रो उपस्थिती
सुनसरी क्षेत्र नं. २ अन्तर्गत पाँच पालिका पर्छन्—देवानगञ्ज गाउँपालिका (७ वटै वडा), हरिनगर गाउँपालिका–३, रामधुनी नगरपालिका (१, २, ३, ५, ८, ९), इनरुवा नगरपालिका (१, २, ५, ६, ९, १०) तथा इटहरी उपमहानगरपालिका (१–५ र १६–२०)।
कुल ३० वडा समेटिएको यस क्षेत्रमा करिब १ लाख ५८ हजार मतदाता छन्। इटहरी र रामधुनीमा एमालेको मताधार बलियो रहेको नेताहरूको दाबी छ। इनरुवामा पनि पार्टीको उपस्थिति राम्रो मानिन्छ।
गुट अन्त्य, एकढिक्का एमाले
एमालेको विगतको चुनौती गुटगत असन्तुष्टि मानिँदै आएको थियो। अघिल्लो निर्वाचनमा समेत पार्टीभित्रको असन्तुष्टिका बाबजुद भीम आचार्य विजयी भएका थिए।
यसपटक भने गुटगत विवाद नरहेको र सबै नेता–कार्यकर्ता सुजन लामाको पक्षमा एकजुट भएको दाबी एमाले नेताहरूको छ। टिकट वितरणमा ठूलो विवाद नदेखिएकाले असहयोगको सम्भावना न्यून रहेको उनीहरूको भनाइ छ।
पूर्वमेयर चौधरीको दाबी : “अघिल्लोभन्दा बढी मत आउँछ”
इटहरीका पूर्वमेयर तथा सुनसरीका पूर्व एमाले अध्यक्ष द्वारिकलाल चौधरी चुनावी कमाण्डरको भूमिकामा छन्। भ्रष्टाचारविरोधी छवि बनाएका चौधरी सुजन लामाले अघिल्लो निर्वाचनभन्दा बढी मत ल्याउने दाबी गर्छन्।उनी भन्छन्, “युवा र काम गर्ने उम्मेदवार चाहिएको थियो, पार्टीले त्यही रोजेको हो। यसपटक एमालेले अझै राम्रो मतले जित निकाल्छ।”
सुजनको प्रतिबद्धता : “काम गर्छु, निराश बनाउँदिन”
उम्मेदवार सुजन लामा आफूले पाएको जिम्मेवारी इमान्दारीपूर्वक पूरा गर्दै आएको बताउँछन्। मतदाताले अवसर दिएमा क्षेत्रको विकासका एजेन्डा बोकेर प्रभावकारी लबिङ गर्ने उनको प्रतिबद्धता छ।“विद्यार्थीदेखि ज्येष्ठ नागरिकसम्मका भावना बुझेर काम गर्नेछु,” उनी भन्छन्।
अन्य दलको अवस्था
अघिल्लो निर्वाचनमा तेस्रो शक्ति बनेको राष्ट्रिय स्वतन्त्र पार्टी प्रति यस क्षेत्रमा केही आकर्षण देखिन्छ। प्रदेश महामन्त्री लालविक्रम थापा पुनः उम्मेदवार छन्। यद्यपि पछिल्ला विवाद र कानुनी मुद्दाका कारण उनी दबाबमा रहेको विश्लेषण छ।
नेपाली काँग्रेस पनि यस क्षेत्रको परम्परागत बलियो शक्ति हो। दुई कार्यकाल जिल्ला सभापति भइसकेका एक अनुभवी नेताले उम्मेदवारी दिएका छन्। यद्यपि केही क्षेत्रमा स्वतन्त्र उम्मेदवारको चुनौती र रास्वपातर्फ मत सर्ने सम्भावनाले काँग्रेसलाई दबाबमा राखेको छ।
त्यसैगरी नेपाल कम्युनिष्ट पार्टी बाट पूर्व सांसद रामकुमारी चौधरी उम्मेदवार छिन्। अघिल्ला निर्वाचनमा उल्लेख्य मत नआए पनि यसपटक समीकरण बदलिन सक्ने दाबी नेकपा नेताहरूको छ।
इटहरीका केही वडामा सक्रिय श्रम संस्कृति पार्टीबाट चेतन राई उम्मेदवार छन् भने कुलमान घिसिङ अध्यक्ष रहेको उज्यालो नेपालबाट गोपाल तामाङ उम्मेदवार बनेका छन्।
सारमा, विगतको मतगणित, स्थानीय तहमा संगठनको अवस्था र आन्तरिक एकताका आधारमा एमाले उत्साहित देखिए पनि रास्वपा र काँग्रेसको प्रतिस्पर्धाले सुनसरी–२ को चुनावी मैदान रोचक बन्ने संकेत गरेको छ।
Discussion about this post