बिहेको दिन गन्दै थियो, दैवले खोस्यो छोरो

सर्लाही । सर्लाहीको ईश्वरपुर नगरपालिका–७ पोखरी टोल बुधबार बिहानदेखि स्तब्ध छ । घरमा बिहेको खुसीको तयारी चलिरहेका बेला २० वर्षीय छोरा अनिल महतो आफ्नै गाउँ नजिकको पोखरीमा मृत अवस्थामा फेला परे। सोमबार राति परिवारसँगै खाना खाएर सुत्न गएका अनिल त्यसपछि घर फर्किएनन्।

मंगलबार बिहान कोठाको ढोका खुल्लै देखेपछि परिवार चिन्तित बन्यो। दिनभर खोजतलास गर्दा पनि फेला नपरेपछि मंगलबार नै प्रहरीमा निवेदन दिइयो। तर बुधबार दिउँसो स्थानीयले घरबाट करिब एक किलोमिटर टाढा रहेको पोखरीमा शव देखेपछि अनिलको खोजीको उत्तर शोकमा परिणत भयो।

जिल्ला प्रहरी कार्यालय सर्लाहीका प्रवक्ता एवं डिएसपी सरोज राईका अनुसार पोखरीबाट अनिलको शव बरामद गरिएको हो । शवसँगै उनको मोबाइल फोनसमेत फेला परेको प्रहरीले जनाएको छ। घटनाबारे थप अनुसन्धान भइरहेको छ। लेबरका रूपमा राजमिस्त्रीको काम गर्दै आएका अनिल परिवारका आशा थिए। उनका बुवा रामप्रताप महतोका अनुसार सोमबार राति छोरा अनिलसँगै खाना खाएर सुत्न गएका थिए।

शव पोस्टमार्टमका लागि प्रादेशिक अस्पताल मलंगवा ल्याइए पनि निष्पक्ष र न्यायिक छानबिनको माग गर्दै परिवारले शव बुझ्न अस्वीकार गरेको छ। सबैभन्दा पीडादायी पक्ष के छ भने, बुधबार नै अनिलको बिहेको छेका तय गर्ने कार्यक्रम थियो। विवाहको तयारी चलिरहेका बेला अकस्मात् घटेको यस घटनाले महतो परिवार मात्र होइन, पूरै गाउँलाई शोकमा डुबाएको छ।