जनकपुरधाम । मधेस प्रदेशमा मुख्यमन्त्रीको दाबी आज पेस गर्नुपर्ने छ । प्रदेश प्रमुख सुरेन्द्र लाभ कर्णले प्रदेशसभामा प्रतिनिधित्व गर्ने दलहरूलाई मुख्यमन्त्री पदमा दाबी पेस गर्न आज साँझ ५ बजेसम्मको समय दिएका छन्।नेपाली कांग्रेस प्रदेशसभा संसदीय दलका नेता कृष्ण यादव र पूर्वमुख्यमन्त्रीसमेत रहेका लोसपाका नेता जितेन्द्र सोनलले दाबी नछाड्दा मधेस प्रदेशमा मुख्यमन्त्री टुंग्याउन सात दललाई सकस परेको छ।
बिहीबार दिनभर बसेको सातदलको बैठकले पनि मुख्यमन्त्रीमा सहमती जुटाउन नसक्दा शुक्रबार बिहान नौबजेपछि दल फेरि छलफलमा बसेका छन्।सात दलको हिजो जनकपुरमा सात घण्टा बैठक बसेपनि कुनै निष्कर्ष ननिस्किएको एक सांसदले बताए।
हिजोको सात दलको बैठकले मुख्यमन्त्रीमा दाबी नगरेका प्रदेश सभाका चार दललाई यादव र सोनलमध्ये एक जनाको नाम मुख्यमन्त्रीमा टुंग्याउने जिम्मा पाएका छन्। जसपा, जनमत, माओवादी केन्द्र र एकीकृत समावादीले मुख्यमन्त्रीको नाम टुंग्याउने जिम्मेवारी पाएका हुन्।
सात दलको बैठकमा यादव र सोनलले दाबी नछाडेपछि माओवादी संसदीय दलका नेता भरत साहले मुख्यमन्त्रीको नाम टुंग्याउने जिम्मा चार दललाई दिन प्रस्ताव गरेका थिए।साहको प्रस्ताव अनुसार नै बैठकले मुख्यमन्त्रीको नाम टुंग्याउने जिम्मा चार दलले पाएका हुन्। हिजोको बैठकमा यादव र सोनल दुवैले चार दलले जसको नाम टुंग्याए पनि त्यो आफूहरुलाई मान्य हुने प्रतिवद्धता जाहेर गरेका ती सांसदको भनाई छ।
मुख्यमन्त्रीसँगै दलहरुले सरकारमा मन्त्रालय भागबण्डाको विषयमा पनि प्रारम्भिक छलफल गरेका छन्। तर, मुख्यमन्त्रीमै सहमती नभइसकेको अवस्थामा त्यो विषय मुख्य प्राथमिकतामा परेको छैन।एमालेबाट सभामुख बनेका रामचन्द्र मण्डल महाअभियोगबाट पदमुक्त भएपछि अहिले मधेसमा सभामुख पद पनि खाली छ। अहिले उससभामुख बबिता राउत ईशरले प्रदेशसभा बैठक सञ्चालन गर्दै आएकी छन्।
अहिले दलहरुबीच सभामुखको विषयमा छलफल भएको छैन। हिजोको बैठकमा केही नेताले सभामुखमा पनि प्याकेजमै सहमती गरौँ भन्ने प्रस्ताव गरे पनि धेरैले त्यस विषयमा छलफल गर्न थालियो भने विवाद झन् बढ्ने भन्दै मुख्यमन्त्री टुंग्याएपछि मात्रै सभामुखको विषयमा छलफल गर्दा उपयुक्त हुने बताएका थिए।
ठूलो दलको हैसियतमा गएको कात्तिक २४ गते मधेसको मुख्यमन्त्री नियुक्त भएका सरोज यादवले प्रदेशसभामा बहुमत सिद्ध गर्न नसकेपछि गएको बुधबार पदबाट राजीनामा दिएका थिए।उनको राजीनामापछि एमालेबाहेकका सात दल मधेसमा नयाँ सरकार गठनको लागि अघि सरेका हुन्।
Discussion about this post