इटहरी । पूर्वराष्ट्रपति विद्यादेवी भण्डारीले जेनजी आन्दोलनका क्रममा देशका सर्वोच्च सरकारी कार्यालयदेखि वडा कार्यालय हुँदै व्यक्तिगत वासस्थानसम्म व्यापक आगजनी र तोडफोड हुनु रहस्यमय भएको बताएकी छन्।
शुक्रबार मदन भण्डारी मेमोरियल कलेजमा आयोजित अन्तरक्रिया कार्यक्रममा उनले जेनजी आन्दोलन शान्तिपूर्ण हुने आशा गरिएको भए पनि ध्वंसात्मक घटना हुन पुगेको बताइन् ।
उनले भनिन्,’आन्दोलनका माग राम्रो छन् र शान्तिपूर्ण हुने भनिएको थियो । तर ठूलो संख्यामा युवाहरूले ज्यान गुमाउनु पर्यो, यो दुःखद छ।’ शान्तिपूर्ण भनिएको आन्दोलनको क्रममा तोडफोड र आगजनी जेनजीले कसरी गर्न सक्यो होला भन्ने प्रश्न उनले गरिन् ।
‘देशका सर्वोच्च संस्थाहरू, व्यावसायिक भवनहरू र व्यक्तिगत घरहरू एकै दिन, लगभग एउटै समयमा पूर्वदेखि पश्चिमसम्म जलेका छन्। वडा कार्यालयदेखि सिंहदरबारसम्म यस्तो व्यापक विनाश कसरी सम्भव भयो ? यसरी आन्दोलनले आफ्नो माग पूरा गर्न सक्दैन। यो घटनाको गहिरो समीक्षा हुन आवश्यक छ,’ उनको भनाइ थियो ।
उनले यस घटनाले गर्दा शान्तिपूर्ण आन्दोलनको भावना प्रभावित भएको उल्लेख गर्दै भविष्यमा यस्ता घटनाको पुनरावृत्ति रोक्न समीक्षा गर्नुपर्ने बताएकी छन् ।
Discussion about this post