इटहरी । कोशी प्रदेशका २८ वटा प्रतिनिधिसभा निर्वाचन क्षेत्रमा नेपाली कांग्रेसले चार क्षेत्रमा प्रत्यक्ष चुनाव जितेको छ। कांग्रेसका तर्फबाट पाँचथर–१ मा नरेन्द्रकुमार केरुङ, इलाम–१ मा निश्कल राई, तेह्रथुममा सन्तोष सुब्बा र सोलुखुम्बुमा प्रकाशसिंह कार्की विजयी भएका हुन्।
पाँचथर–१ मा केरुङले १७ हजार २३३ मत ल्याएर जित हासिल गर्दा सो क्षेत्रमा कांग्रेसले समानुपातिकतर्फ १४ हजार १०० मत पाएको छ। इलाम–१ मा निश्कल राईले १४ हजार ५४३ मतसहित विजयी हुँदा कांग्रेसले समानुपातिकतर्फ १० हजार ८१६ मत प्राप्त गरेको छ।
तेह्रथुममा सन्तोष सुब्बा ११ हजार ५६१ मत ल्याएर विजयी भए भने सो क्षेत्रमा कांग्रेसले समानुपातिकतर्फ ९ हजार ३१२ मत पाएको छ। त्यस्तै सोलुखुम्बुमा प्रकाशसिंह कार्की १३ हजार १६६ मतसहित विजयी हुँदा कांग्रेसले समानुपातिकतर्फ १० हजार ७०५ मत प्राप्त गरेको छ। यसबाट प्रत्यक्षमा जितेका उम्मेदवारले पाएको मतभन्दा समानुपातिक मत केही कम रहेको देखिन्छ।
अन्य क्षेत्रमा भने कांग्रेसका उम्मेदवारहरू दोस्रो, तेस्रो, चौथो र पाँचौं स्थानमा सीमित भएका छन्। कोशी प्रदेशका २८ वटै क्षेत्रमा कांग्रेसका उम्मेदवारहरूले प्रत्यक्षतर्फ पाएको कुल मत ३ लाख ६० हजार ८०९ रहेको छ भने समानुपातिकतर्फ २ लाख ९० हजार ५६२ मत प्राप्त भएको छ।
Discussion about this post