काठमाडाै ।  ६ महिनाको अवधीमा ६१२ जना नेपालीले विदेशमा ज्यान गुमाएका छन् भने ११४ जना अङ्गभङ्ग भएर स्वदेश फर्किएका छन् । वैदेशिक रोजगार बोर्डका अनुसार चालु आर्थिक वर्षको साउनदेखि पुस अन्तिमसम्ममा वैदेशिक रोजगारीको क्रममा ६ सय १२ जनाले ज्यान गुमाएका हुन् । यो वैदेशिक रोजगार बोर्डमा प्राप्त भएको तथ्याङ्क मात्रै हो । 

६ महिनामा सबैभन्दा धेरै साउदी अरेबियामा १८५ जना नेपालीले ज्यान गुमाएका छन् । त्यसपछि मलेसियामा १२३ जना, कतारमा ११७ जना नेपालीले वैदेशिक रोजगारीका क्रममा ज्यान गुमाएका बोर्डले जनाएको छ । 

यस्तै यही अवधिमा यूएईमा १०४, कुवेतमा ३०, बहराइनमा १२, जोर्डनमा २, टर्कीमा २, सेसल्समा १, रोमानियामा ४ र दक्षिण कोरियामा ११ जनाको ज्यान गएको बोर्डको तथ्याङ्कमा उल्लेख छ । यस्तै सोही अवधिमा साउदी अरेबियाबाट ३८ जना अङ्गभङ्ग भएर स्वदेश फर्किएका छन् भने यूएईबाट २४ जना अङ्गभङ्ग भएर स्वदेश फर्किएका छन् । 

यस्तै कतारबाट २२, मलेसियाबाट १६, कुवेतबाट ५, रोमानियाबाट २, कोरियाबाट २, पपुवान्युगिनी, माल्टा, जापान, इजरायल र क्रोएसियाबाट एक एक जना अङ्गभङ्ग भएर स्वदेश फर्किएका बोर्डले जनाएको छ ।