•  २० माघ २०७९, शुक्रबार
  •  2:04:07 AM

दर्ता नभएका मोबाइल आजदेखि नचल्ने

- पुष १५, २०७९ मा प्रकाशित


Share This..

काठमाडौं । ‘मोबाइल डिभाइस म्यानेजमेन्ट सिस्टम (एमडीएमएस)’ प्रणालीमा दर्ता नभएका मोबाइल आज शुक्रबारदेखि नचल्ने नेपाल दूरसञचार प्राधिकरणले जनाएको छ । यसअघि प्राधिकरणले पुस १५ गते शुक्रबारदेखि पूर्ण रूपमा सञ्चालनमा ल्याउन लागेको एमडीएमएस प्रणालीमा दर्ता नभएका त्यस्ता मोबाइललाई अवैध घोषणा गरेर मोबाइल नेटवर्क प्रयोग गर्न नमिल्ने सूचना जारी गरेको थियो ।

भन्सार छलेर अवैध रूपमा भित्रिएका मोबाइलको प्रयोग निरुत्साहित गर्ने उद्देश्यले यो कदम उठाउनु परेको प्राधिकरणको भनाइ छ । प्राधिकरणले एक हप्ता यता सार्वजनिक सूचना नै जारी गरेर शुक्रबारदेखि दर्ताबिनाका कुनै पनि मोबाइल प्रयोगमा रोक लगाइने जनाएको थियो । प्राधिकरणका अनुसार अबदेखि व्यावसायिक वा व्यक्तिगत रूपमा ल्याइएका मोबाइल यो प्रणालीमा अनिवार्य रूपमा दर्ता गर्नुपर्ने छ । नभएमा मोबाइल चल्ने छैन ।

विदेशबाट व्यक्तिगत रूपमा ल्याइने मोबाइल पनि भन्सार प्रज्ञापनपत्र घोषणा भएको हुनुपर्ने प्राधिकरणको भनाइ छ । प्रज्ञापनपत्रलाई अनलाइनमार्फत एमडीएमएस प्रणालीमा दर्ता गरेर मात्र प्रयोग गर्न सकिनेछ । मोबाइल ल्याएको पहिलो दुई हप्तासम्म दर्ता विना नै सञ्चालन हुनसक्ने तर सो पछि स्वतः अवरुद्ध हुने प्राधिकरणले जनाएको छ । प्राधिकरणका निर्देशक डा। सुरेन्द्रलाल हाडाका अनुसार दर्ताबिनै दुई हप्ता प्रयोग गर्न सकिने सुविधा खासगरी पर्यटकलाई लक्षित गरेर उपलब्ध गराइएको सेवा हो ।

प्राधिकरणले गत भदौ ३० गते पहिलो पटक परीक्षणकालका एमडीएमएस प्रणाली सञ्चालनमा ल्याएको थियो । त्यसअघि प्रयोगमा रहेका जुनसुकै मोबाइललाई भने प्राधिकरणले स्वतः उक्त प्रणालीमा दर्ता गरिसकेको छ । असोज महिना यता आयात भएका मोबाइललाई प्राधिकरणले अनिवार्य रूपमा दर्ता गराउनुपर्ने प्रावधान राखेको छ ।

प्राधिकरणले करिब ८० करोड रुपैयाँ लगानीमा एमडीएमएस प्रणाली सञ्चालनमा ल्याएको जनाएको छ । यो प्रणालीसँग सबै दूरसञ्चार सेवा प्रदायक र भन्सार प्रणाली आबद्ध हुने व्यवस्था मिलाइएको प्राधिकरणको भनाइ छ । प्रणालीमा दर्ता नभएका मोबाइललाई कालोसूचीमा राखेर त्यस्ता मोबाइलमा ‘नेटवर्क लक’ गर्न प्राधिकरणले सेवा प्रदायकलाई निर्देशन दिने निर्णय गरेको छ । प्राधिकरणको यो कदमको व्यवसायी र प्रयोगकर्ताले आलोचना गरेका छन् ।

Comments

सम्बन्धित खवर