एजेन्सी । कतारमा जारी विश्वकप फुटबलमा स्विट्जरल्यान्डलाई   पराजित गर्दै पोर्चुगल क्वाटरफाइनलमा प्रवेश गरेको छ । राउण्ड अफ १६ को अन्तिम खेलमा पोर्चुगलले ६–१ को जित निकालेको हो । फरवार्ड गोन्सालो रामोसले ह्याट्रिक गरेपछि  स्विट्जरल्यान्डलाई पराजित गर्दै पोर्चुगल कतारमा जारी फिफा विश्वकपको क्वाटरफाइनलमा प्रवेश गरेको हो । 

२१ वर्षीय युवा फरवार्ड रामोस जारी विश्वकपमा ह्याट्रिक गोल गर्ने पहिलो खेलाडी बनेका छन् । पोर्चुगिज प्रशिक्षक फर्नाण्डोे सान्तोषले नियमित कप्तान तथा सुपरस्टार खेलाडी क्रिस्टियानो रोनाल्डो ड्रप गरी युवा फरवार्ड गोन्सालो रामोसलाई राख्ने साहसिक निर्णय लिएका थिए । रामोसले प्रशिक्षकको विश्वासलाई प्रमाणित गरिदिए । उनले पहिलो हाफमा एक तथा दोस्रो हाफमा दुई गोल गरेका थिए । 

रामोसले जाआओ फेलिक्सको पासमा १७औं मिनेटमै गोल गर्दै पोर्चुगललाई अग्रता दिलाए । डिफेण्डर पेपेले ३२औं मिनेटमा ब्रुनो फर्नान्डेजको कर्नरमा गोल गर्दै पोर्चुगलको अग्रता दोब्बर पारे ।पहिलो हाफमा दुई गोल गरेको अग्रता लिएको पोर्चुगलका लागि ५१औं मिनेटमा रामोसले डिएगो डालोटको पासमा व्यक्तिगत दोस्रो गोल गर्दै पोर्चुगलको अग्रता ३–० बनाए । ५५औं मिनेटमा राफेल गुरेइरोले रामोसकै पासमा गोल गर्दै पोर्चुगलको अग्रता ४– ० पुर्‍याए ।

५८औं मिनेटमा स्वीजरल्याण्डका मानुएल अकान्जीले गोल फर्काउँदै गोल अन्तर घटाएका थिए । तर, ७१औं मिनेटमा रामोसले फेलिक्सको पासमा व्यक्तिगत तेस्रो गोल गर्दै ह्याट्रिक पूरा गरे भने पोर्चुगलको अग्रता फराकिलो बनाए ।इन्जुरी टाइममा राफे लिआयोले गोल गर्दै पोर्चुगललाई ६– १ को जित दिलाए ।पोर्चुगलले  क्वाटरफाइनलमा अफ्रिकन टिम मोरक्कोसँग खेल्नेछ । मोरक्को २०१० को विजेता स्पेनलाई पेनाल्टी शुटआउटमा हराउँदै पहिलो पटक विश्वकपको क्वाटरफाइनलमा पुगेको हो ।