बिराटचाैक । मोरङको उर्लाबारी रहेको तरल क्याफेमा दुई समूहबीच झडप भएको छ । शुक्रबार साँझ दुई समूहबीच झडप भएको हो । झडपमा एक जना गम्भिर घाइते भएका छन् । २ जना सामान्य घाइते छन् । 

 उर्लाबारी–६ स्थित तरल क्याफेमा उर्लाबारी–४ आइतबारेका कुमार लिम्बूको समूह र उर्लाबारी—६ का रजत थापा समूहबीच झडप भएको थियो । कुमार लिम्बू नेकपा एमाले उर्लाबारीका नगर उपाध्यक्ष हुन् । मोरङ प्रहरीका प्रवक्ता डिएसपी दीपक श्रेष्ठका अनुसार झडपमा उर्लाबारी—४ का गौतम तामाङ गम्भीर घाइते छन् । उनको बिर्तामोड स्थित बीएन्डसी अस्पतालमा उपचार भइरहेको प्रहरीले जनाएको छ ।

 उर्लाबारी–७ का नितम चौहान र उर्लाबारी–८ का मिलन श्रेष्ठ छन् । उनीहरुको अवस्था सामान्य छ । थापा,चौहान र श्रेष्ठ बसिरहेको समयमा लिम्बूको समूह आएर उनीहरुमाथि धारिलो हतियारले आक्रमण गर्न खोजेपछि झडप भएको प्रहरीले जनाएको छ ।

 घटनामा संलग्नको भएको आरोपमा प्रहरीले एमाले उर्लाबारीका नगर उपाध्यक्ष कुमार लिम्बूसहित उर्लाबारी–५ का आशाङ लिम्बु र उर्लाबारी–६ का रजत थापालाई पक्राउ गरेको छ । पुराना रिसिईबीलाई लिएर लिम्बूको समूहले थापालाई आक्रमण गरेको देखिएको प्रहरीले बताएको छ ।