काठमाडौं / स्थानीय निर्वाचनमा पराजय ब्यहोरेपछि हारको जिम्मेवारी लिँदै पार्टीको अध्यक्षबाट राजीनामा दिएका विवेकशील साझा पार्टीका रवीन्द्र मिश्रले आफ्नो जीवनमा कसैको राजनीतिक प्रतिशोध पुरा भएको गुनासो गरेका छन्। जेठ ११ गते अध्यक्ष पदबाट राजीनामा दिएका मिश्रले बुधवार ट्वीटरमार्फत उक्त गुनासो बाहिर ल्याएका हुन्।

एक भेटमा आफूलाई एक जनाले सिधै ‘तपाईलाई नखुइल्याई त मेरो/हाम्रो राजनीतिक अभिष्ट नै पुरा हुँदैन नि!’ भनेको उल्लेख गर्दै मिश्रले ती व्यक्तिको प्रतिशोध पुरा भएको बताएका हुन्। उनले आफू अब खुइलिएकोसमेत बताएका छन्।

उनले ट्वीटमा उल्लेख गरेका छन्, ‘अब म खुइलिएँ। तपाईं(हरू)को राजनीतिक अभिष्ट पुरा होस्।’ त्यसो त उनले ती व्यक्तिको नाम भने उल्लेख गरेका छैनन्।राजीनामाको भोलिपल्ट मिश्रले तत्काल सञ्चार माध्यमलाई कुनै प्रतिक्रिया नदिने बताएका थिए।