इटहरीः स्वतन्त्र तर्फबाट इटहरी उपमहानगरपालिकाको मेयर पदमा उम्मेद्वारी दिएका पदम अधिकारीले बिचारका हिसावले आफुले जित निकालिसकेको बताएका छन् ।
आइतबार इटहरीमा भएको योजना कार्यान्वायन पत्र सार्वजनिक कार्यक्रममा बोल्दै अधिकारीले आफ्नै क्षमता र मेहनतले कार्ययोजना पत्र तयार पारेको भन्दै आफुले बिचारका हिसावले हित हासिल गरिसकेको बताएका थिए ।

दलहरुको विकल्पमा लोकतन्त्रको संस्थागत गरौँ, सुशासनका लागि नागरिक सशक्तिकरण कायम गरौँ भन्ने नाराका साथ स्वतन्त्र उम्मेद्वार बनेर चुनावी मैदानमा उत्रिएका मेयर पदमा पदम कुमार अधिकारी , उपमेयर पदमा अन्जु कुमारी सिंह खवास, वडा अध्यक्षहरु वडा नम्बर ५ का सुरेस सुवेदी, वडा नम्बर ७ मा भिनेश्वर खवास, वडा नम्बर १० मा षडानन्द दाहाल र वडा नम्बर १३ मा सुनरलाल चौधरीले स्वतन्त्र उम्मेद्वारी दिएका छन् । स्वतन्त्र उम्मेद्वारी दिनेहरुमा पनि आफुहरुको विचार मिलेका कारण एक भएर अगाडी बढेको मेयरका उम्मेद्वार अधिकारीले बताएका छन् ।

योजना कार्यान्वयन पत्र सार्वजनिक गर्दै स्वतन्त्र उम्मेद्वारहरुले दलप्रतिनिधि नभई जनप्रतिनिधि छनौट गर्नका लागि स्थानीय तहमा स्वतन्त्र उम्मेद्वारहरुलाई जिताउनु पर्ने आवश्यकता औल्याए । स्वतन्त्र उम्मेद्वारले जिते उनिहरु जनताप्रति उत्तरदायी हुने तर दलका प्रतिनिधिले जिते उनिहरु दलप्रति उत्तरदायी हुने हुँदा दलतन्त्र भन्दा जनप्रतिनिधि छान्न स्वतन्त्र उम्मेद्वारलाई विजयी गराउनुपर्ने बताएका छन् ।

इटहरीको बाढी र डुवानको दिर्घकालिन समाधानका लागि आफुहरुसँग स्पष्ट योजना रहेको अधिकारीले सुनाए । उनले इटहरीको आगलागी समस्या, बाढिको समस्या, पैसा पलायनको समस्या, बहाल करको समस्या, ट्राफिक अनुसासन, संस्कृतीको अतिक्रमणको समस्या आदीले इटहरीलाई गाँजेको र त्यसबाट मुक्ति पाउन आफुलाई जिताउनु पर्ने भनाई राखेका छन् ।

आफुले जितेको खण्डमा मानव संसाधनको अभिलेखिकरण गर्ने , आवधिक कार्ययोजना बनाएर लघु औद्योगिक क्षेत्रको निर्माण गर्दै सम्वयात्म संयन्त्रको निर्माण सहित पर्यटन, शहरि कृषि आवास , फोहोर व्यावस्थापन, पर्यावरण निति लगायतका व्यावस्था ल्याएर इटहरीलाई सम्मुन्नत शहर बनाउने कार्ययोजना मेयरका उम्मेद्वार अधिकारीले प्रस्तुत गरेका छन् ।

उनले खेलकुदका लागि खेलकुद विकास समिति बनाएर लैजाने , कला साहित्य र संगीतका लागि स्वायत्त प्रज्ञा प्रतिष्ठान बनाउने, थारु भाषालाई स्थानीय कामकाजको भाषाको रुपमा मान्यता दिने, खानेपानी प्राद्यिकरण बनाउने जस्ता योजनालाई अघि सारेका छन् । अधिकारी सहित ६ जना स्वतन्त्र उम्मेद्वारको टोली इटहरी उपमहानगरको आसन्न निर्वाचनमा खानेपानीको धारा चुनाव चिन्ह बाट चुनावी मैदानमा होमिएको छ ।