काठमाडौं। जनता समाजवादी पार्टी(जसपा)का अध्यक्ष उपेन्द्र यादव तत्कालीन मधेशी जनअधिकार फोरमको अध्यक्ष हुँदा आजभन्दा सत्र वर्षअघि घटेको गौर हत्याकाण्ड अहिले फेरि चर्चामा छ। सरकारले गौर हत्याकाण्डमा संलग्नलाई कारबाही गर्ने पीडितसँग गरेको सहमतिले तर्सिएका उपेन्द्र यादव पछिल्लो समय छानबिन नगर्ने सरकारको निष्कर्ष पछि राहत महशुस गरेका थिए । तथापि रौतहटकै सांसद तथा आम जनता पार्टीका अध्यक्ष प्रभु शाहले यस विषयलाई बारम्बार उठान गर्दै आएका छन् ।

मधेश केन्द्रित राजनीतिक सक्रियता बढाएका उपेन्द्रलाई गौर हत्याकाण्डले चर्चामा ल्याएको थियो । उनको सो हत्याकाण्ड पछि राष्ट्रिय राजनीतिमा उदय भएको थियो।तत्कालीन मधेश जनअधिकार फोरमसँगको झडपमा परी २०६३ चैत ७ गते माओवादीका २७ जना कार्यकर्ताले ज्यान गुमाएका थिए ।त्यतिबेला माओवादीमै रहेका सांसद शाह घटना भएको जिल्ला रौतहट निवासी हुन् । उनकै हठका कारण उत्पन्न असामान्य परिस्थितिले उक्त घटना घटेको जसपाका नेताहरु बताउँछन्। माओवादीको ज्यादतीविरुद्ध जनताहरुले प्रतिकार गर्नेक्रममा गौरमा अप्रिय घटना घटेको उनीहरुको दाबी छ ।

एकै स्थलमा कार्यक्रम गर्न जुटेका दुई पक्षबीच मनमुटाव हुँदा असहज परिस्थिति उत्पन्न भएर झडपको अवस्था निम्तिएको बताइरहँदा सांसद शाहले भने सम्पूर्ण दोषारोपण यादवमाथि गर्दै उनी लक्षित अभिव्यक्ति दिइरहेका छन्।विगतको साम्य भइसकेको उक्त घटना पुनः खोतल्ने दाउमा शाह लागेका छन्। उनले राज्यले न्याय दिन उदाशिन बनेको भन्दै हेग जाने चेतावनी दिएका छन् ।उनले सोमबार काठमाडौंमा बसेको पार्टीको केन्द्रीय समित बैठककलाई सम्बोधन गर्दै गौर हत्याकाण्डविरुद्ध हेग जाने चेतावनी दिएका हुन् ।

सरकारले गौर हत्याकाण्डको छानबिनलाई सत्ता राजनीतिको जोड घटाउमा सौदाबाजी गरेको आरोप लगाउँदै पीडितहरुमाथि अन्याय गरिएको बताए । सरकारबाट न्याय पाउने आशा नरहेकाले अन्तर्राष्ट्रिय अदालत जाने अवस्था आएको उनको भनाइ थियो।सांसद शाहले पछिल्लो समय एकतर्फी रुपमा गौर हत्याकाण्डको विषयलाई निकै पेचिलो रुपमा उठाएका छन् । मधेश केन्द्रित राजनीति गरिरहेका उपेन्द्रमाथि शाहको निरन्तर प्रहार जारी छ ।

मधेशमा आफ्नो प्रभाव कायम गरेका शाह बलियो जनाधार भएका नेता मानिन्छन् । उनी निरन्तर चुनाव जित्ने नेतामा पर्दछन् । गत मंसिरको निर्वाचनमा एमालेबाट टिकट नपाएर रौतहट ३ मा स्वतन्त्र उम्मेदवारी दिएर पनि जित हासिल गरेका हुन् ।दुबै मधेश प्रदेशका शक्तिको लडाइँले एक अर्काबीच आरोप प्रत्यारोपमा उत्रिएको बताइन्छ। एमालेबाट विद्रोह गरेर आफ्नै नेतृत्वमा नयाँ पार्टी गठन गरेका शाह मधेशमा स्थपित हुन चाहन्छन् । उनले यादवलाई विस्तापन गर्ने ध्याउन्नमा गौर हत्याकाण्डको मुद्दा उठान गरेको सर्वत्र चर्चा छ।

प्रतिनिधि सभामा सप्तरी २ बाट जनमत पार्टीका अध्यक्ष सिके राउतसँग पराजित भएका यादव गत बैशाख १०मा बारा २ को उपनिर्वाचनमार्फत सदनमा प्रवेश गरेका छन् ।मधेशमा भर्खरै उदय भएको जनमत पार्टीका अध्यक्ष राउतसँग पराजित भएका यादव संसद प्रवेश गर्न आफ्नो पार्टीका बारा २ बाट निर्वाचित सांसद रामसहायप्रसाद यादवलाई उपराष्ट्रपति बनाएर उपनिर्वाचनब लडेका हुन्।

मधेशमा राउत, यादव र शाह आफ्नो दल स्थापित गराउने दाउमा छन् । मधेश राजनीतिमा लामो समय देखि रजगज गरेका यादवविरुद्ध पछिल्लो समय शाह र राउत केन्द्रित भएका छन् । यादवविरुद्ध प्रहार गर्ने पछिल्लो कडीका रुपमा शाहले गौर हत्याकाण्डलाई प्रखरताका साथ उठान गरिरहेका छन् ।उपेन्द्रको विगतदेखि मधेश आधारित राजनीतिको विरासत भत्काउन गौर हत्याकाण्लाई प्रमुख अस्त्रका रुपमा लिएर शाहले निरन्तर आक्रमण गरिरहेको मधेश राजनीतिका जानकारहरु बताउँछन्।