काठमाडौं । संघीय संसद अन्तर्गतको प्रतिनिधिसभाको बैठक आज (सोमबार) बस्दै छ । बैठक दिउँसो १ बजेका लागि बोलाइएको छ ।आजको बैठकमा राष्ट्रपतिको कार्यालयबाट प्राप्त कार्यभार तोकिएको र विधेयक प्रमाणीकरणसम्बन्धी पत्र पढेर सुनाउने, प्रधानमन्त्री तथा मन्त्रिपरिषद्को कार्यालयबाट प्राप्त कार्यभार तोकिएको पत्रबारे जानकारी गराउने गराउने सम्भावित कार्यसूची रहेको छ ।

बैठकमा प्रतिनिधिसभा सदस्य टोपबहादुर रायमाझी निलम्बन भएको जानकारी गराउने, सुनील कुमार शर्मा पक्राउ परेको र थुनामुक्त भएको जानकारी गराउने, बाधा अड्काउ फुकाउ आदेश पेस गर्ने, विषयगत समितिमा सदस्य हेरफेरबारे जानकारी गराउनेलगायत कार्यसूची रहेको संसद् सचिवालयले जनाएको छ ।

तर आजको वैठकमा पनि प्रमुख प्रतिपक्षी दल नेकपा एमालेको अवरोध रहने देखिएको छ । हिजो (आइतबार) एमाले मुख्यालय च्यासलमा आयोजित विशेष पत्रकार सम्मेलनमा एमाले अध्यक्ष केपी शर्मा ओलीले संसदको अवरोध कायमै रहने स्पष्ट पारिसकेका छन् । अध्यक्ष ओलीले सय किलो सुन तस्करी प्रकरण छानविनका लागि उच्चस्तरीय संसदीय समिति गठन नभएसम्म संसदको अवरोध कायमै रहने बताएका छन् ।