काठमाडौँ । प्रमुख निर्वाचन आयुक्त दिनेशकुमार थपलियाले निर्वाचनका बेला उम्मेदवारले बुझाएको नागरिकताको प्रमाणपत्र लगायतका कागजात ठीक छन् भनेर  स्वघोषणामा दस्तखत गराएर आयोगले विश्वास गर्ने बताएका छन् । शुक्रबार काठमाडौंमा प्रतिनिधिसभा र प्रदेशसभा निर्वाचन समीक्षा कार्यक्रममा बोल्दै प्रमुख आयुक्त थपलियाले उम्मेदवार स्वंयलाई आफ्नो कागजात ठीक छ भनेर स्वघोषणामा दस्तखत गर्न लगाएर उम्मेदवारी दर्ता गर्ने गरेका कारण त्यसमा आयोगको कमजोरी नहुने दावी गरे । 

उनले आयोगले उम्मेदवार नेपाली नागरिक हो कि हैन र उम्मेदवार बन्नका लागि उमेर पुगेको छ छैन हेर्नका लागि नागरिकताको प्रमाणपत्र माग्ने गरेको बताउँदै उजुरी परेमा सम्बन्धित निकायबाट त्यसबारेमा जवाफ मागेर निर्णय गर्ने उल्लेख गरे चितवन क्षेत्र नम्बर २ मा राष्ट्रिय स्वतन्त्र पार्टीका उम्मेदवार रवि लामिछानेको उम्मेदवारी दर्ता गर्दा नागरिकताको विषयमा आयोग चुकेको हो भन्ने पत्रकारले सोधेको प्रश्न दिँदै प्रमुख आयुक्त थपलियाले नागरिकताबारे समयमा उजुरी परे आयोगले प्रचलित बिधि अनुसार निर्णय गर्ने बताए ।  उनले उम्मेदवारले बुझाएको नागरिकताको विषयमा उजुरी आए आवश्यक परे आयोगले खोजविन पनि गर्ने र आगामी निर्वाचनका बेला यस विषयमा आयोगले गहन रुपमा हेर्नुपर्ने माग उठे कानुन संसोधन गरेर जानुपर्ने उल्लेख गरे ।