इटहरीः सुनसरीकोइटहरी उपमहानगरपालिकामा नेकपा माओवादी केन्द्रका १५५ जना नेता कार्यकर्ताहरु एकैसाथ सो पार्टी परित्याग गरी नेकपा एमालेमा प्रवेश गरेका छन् ।

२०७४ सालको स्थानीय तहको निर्वाचनबाट १० नम्बर वडाको वडा सदस्यमा निर्वाचित रामनारायण चौधरीसहित १५५ जनाको समूह नेकपा एमालेमा प्रवेश गरेको हो । पार्टी प्रवेश गरेका सबै १५५ जनालाई एमाले केन्द्रीय सदस्य भगवति चौधरी, तैयव हुसेन र इटहरी उपमहानगरपालिकाकी उपप्रमुखसमेत रहेकी केन्द्रीय सदस्य लक्ष्मी गौतमले अबिर लगाएर स्वागत गरेका थिए ।

एमाले प्रवेश गर्दै वडा सदस्य चौधरीले देश र जनताको हितमा काम गर्ने पार्टी एमाले मात्र रहेकाले एमाले प्रवेश गरेको बताए । केन्द्रीय सदस्य भगवति चौधरीको प्रमुख आतिथ्यमा हिजो सम्पन्न पार्टी प्रवेश कार्यक्रममा पार्टीका इटहरी नगर अध्यक्ष यामकुमार सुब्बालगायतका नेताकार्यकर्ताहरुको उपस्थिति रहेको थियो ।