इटहरीः उदयपुरको बेलका नगरपालिका–६ कि १६ वर्षीया कविता सुनुवारको हत्या गरेको आरोपमा २ जनालाई प्रहरीले पक्राउ गरेको छ ।

पक्राउ पर्नेमा भारत सिक्किम बियुङ घर भई उदयपुर बेलका नगरपालिका ३ का जितबहादुर ढकालको घरमा बस्दै आएका १९ वर्षीय बिनोद ढकाल र १७ वर्षीया बालिका रहेको १ नम्बर प्रदेश प्रहरी कार्यालय विराटनगरले जनाएको छ । चैत्र २२ गते बिहान बेलका नगरपालिका–३ स्थित यशोदा खोला किनारमा काठको गोलिया नजिक बालिकाको लाश फेला परेको जानकारी प्राप्त हुनासाथ तत्काल घटनास्थलमा खटिएको इलाका प्रहरी कार्यालय रामपुर ठोक्सिलाको प्रहरी निरीक्षक सहितको टोलीले बेलका नगरपालिका–६ का कृष्ण सुनुवारको १६ वर्षीया छोरी कविता सुनुवार भएको सनाखत भएसँगै हत्याको आरोपमा विनोद ढकाल र १७ वर्षीया बालिकालाई पक्राउ गरेको हो ।

अनुसन्धानको क्रममा कविता सुनुवार र १७ वर्षीया आरोपित बालिका कोशी जनता माध्यमिक विद्यालय रामपुर उदयपुरमा कक्षा १० मा अध्यनरत रहेको र सुनुवारले सानोसानो कुरामा आरोपित बालिकालाई होच्याउने, चिड्याउने गरी आघात पु¥याउने गरेको हुँदा रिसिईवी राखी मार्ने योजना बनाएकोमा चैत्र २२ गते मंगलवार बिहान ४ बजे एसईई तयारी कक्षाको लागि तीनैजना सँगै विद्यालयतर्फ जाँदै गर्दा बाटोमा निजकै दाजु नाता पर्ने विनोद ढकालले लुकाई बोकेको बियरको बोतलले सुनुवारको टाउकोमा प्रहार गरी घाइते बनाएको र ढुङ्गाले समेत प्रहार गरी कर्तव्य गरी मारी मृतकको शवलाई घिसार्दै यशोदा खोला किनारमा रहेको काठको गोलियानजिक शव फालेको खुल्न आएको हो ।
घटनामा आरोपित १७ वर्षीया बालिका र प्रतिवादी विनोद ढकाल समेतलाई सम्मानित उदयपुर जिल्ला अदालतबाट म्याद थप गरी थप अनुसन्धान कार्य भइरहेको प्रहरीले जनाएको छ ।