इटहरीः मोरङको विराटनगरस्थित नोबेल मेडिकल कलेज शिक्षण अस्पतालमा कार्यरत एक चिकित्सकको रहस्यमय अवस्थामा शव फेला परेको छ ।

मृत फेला पर्नेमा विराटनगर महानगरपालिका ४ स्थित नोबेल शिक्षण अस्पतालमा कार्यरत चिकित्सक २७ वर्षीय विजय यादव रहेको जिल्ला प्रहरी कार्यालय मोरङले जनाएको छ । कार्यालयका प्रवक्ता प्रहरी नायबउपरीक्षक (डीएसपी) दीपक श्रेष्ठका अनुसार डा. यादव आज (शनिबार) बिहान मृत भेटिएका हुन् ।

सप्तरीको विष्णुपुर गाउँपालिका १ घर भएका यादव नोबेल अस्पतालको हाडजोर्नी तथा नशा रोग विभागमा मेडिकल अफिसरका रूपमा कार्यरत थिए । उनी विगत ४ वर्षदेखि विराटनगर ४ स्थित प्रेम बस्नेतको घरको दोस्रो तलमा कोठा भाडामा लिएर डेरा बस्दै आएको अस्पतालका प्रबन्धक नारायण दाहालले जानकारी दिए ।

डीएसपी श्रेष्ठका अनुसार नाक तथा मुखबाट रगत बगिरहेको अवस्थामा डेरा बसेको घरको कम्पाउन्डमै डा. यादवको शव फेला परेको हो । डेरा बसेको घरको कम्पाउण्डभित्र चिकित्सक मृत फेला परेको जानकारी आउनसाथ अनुसन्धानका लागि प्रहरीको विशेष टोली परिचालन गरिएको प्रहरीले जनाएको छ ।