काठमाडौं । नेपाली कांग्रेसका विचारक नेता एवं प्रतिनिधिसभा सदस्य प्रदीप गिरीको निधन भएको छ । तीन सातादेखि ललितपुरको मेडिसिटी अस्पतालमा उपचाररत उनको शनिबार राति ९ः३० बजे निधन भएको हो । क्यान्सर र निमोनियाबाट उत्पन्न स्वास्थ्य समस्याका कारण ७५ वर्षको उमेरमा उनको निधन भएको हो ।

गत वर्ष घाँटीमा क्यान्सर देखिएपछि उनलाई उपचारका लागि मुम्बईस्थित हिन्दुजा अस्पताल लगिएको थियो । करिब एक वर्षसम्म गरिएको उपचारबाट पनि सन्तोषजनक नतिजा नआएपछि परिवारले उनलाई नेपाल फर्काएको थियो । साउन ८ गते नेपाल आउना साथ क्यान्सरकै कारण उत्पन्न विभिन्न समस्यासँगै निमोनिया समेत देखिएपछि साउन १० गते उनलाई मेडिसिटीमा भर्ना गरिएको थियो ।

गिरी कांग्रेसभित्रका बौद्धिक नेता र समाजवादी चिन्तकका रुपमा परिचित थिए । १९४७ नोभेम्बरमा जन्मेका गिरी २०१७ सालदेखि राजनीतिमा सक्रिय रहँदै आएका थिए । २०२४ सालमा बनारसमा गठित नेपाल छात्र संघको उपाध्यक्ष भएका गिरी कांग्रेसको १० औं महाधिवेशनपछि केन्द्रीय सदस्य छन् । सिरहालाई राजनीतिक क्षेत्र बनाउँदै आएका गिरी त्यहीबाट प्रतिनिधित्व गर्ने प्रतिनिधिसभा प्रत्यक्षतर्फका सदस्य हुन् ।

राजाको सक्रिय शासनको अन्त्य र प्रजातन्त्र पुनर्बहालीको पक्षमा सक्रिय हुँदा २०२५ सालमा १८ महिना जेल परेका थिए । २०४२ सालको आन्दोलनका क्रममा पनि उनले जेल जीवन भोगे । राजनीतिक विश्लेषक तथा समाजवादी चिन्तक गिरीका झण्डै दुई दर्जन पुस्तक प्रकाशित छन् । उनले बिपी कोइरालाको सान्निध्यमा रहेर काम गरेका थिए । कांग्रेसजनले मात्र नभएर अन्य राजनीतिक दलका कार्यकर्ताले पनि उनलाई बिपीको समाजवादी चिन्तनको सच्चा व्याख्याता रूपमा सम्मान गर्छन् ।

बौद्धिक र गान्धीवादी नेताका रूपमा परिचित गिरी माक्र्सवादका अध्येता र चिन्तक पनि थिए । भारतको जवाहरलाल नेहरु विश्वविद्यालयबाट अर्थशास्त्र र दर्शनशास्त्रका स्नातकोत्तर गरेका उनी समाजवादी चिन्तकको छवि बनाएका नेता पनि हुन् । मुलुकमा देखा परेका विकृति-विसंगतिप्रति स्पष्ट धारणा राख्ने उनी निर्भीक नेता थिए ।

सामाजिक सञ्जालहरूमा श्रद्धाञ्जली दिनेहरूले उनको निधनले नेपाली कांग्रेसलाई मात्र नभएर देशलाई नै अपूरणीय क्षति भएको उल्लेख गरेका छन् । शनिबार राति निधन भएका कांग्रेस नेता तथा प्रतिनिधिसभा सदस्य प्रदीप गिरिको आइतबार पशुपति आर्यघाटमा अन्त्येष्टि गरिने भएको छ । नेपाली कांग्रेस संसदीय दलका सचेतक मीनबहादुर विश्वकर्माले शनिबार राति जारी गरेको शोक वक्तव्यमा आइतबार श्रद्धाञ्जली कार्यक्रम सकिएपछि अन्तिम संस्कारका लागि पशुपति आर्यघाट लगिने उल्लेख छ ।

विश्वकर्माले गिरीको पार्थिव शरीर श्रद्धाञ्जलीका लागि आइतबार दिउँसो पार्टी केन्द्रीय कार्यालय सानेपामा राखिने छ ।
त्यसअघि बिहान ९ बजेदेखि ११ बजेसम्म मेडिसिटी अस्पतालको शिवालयमा पार्थिव शरीर श्रद्धाञ्जलीका लागि राखिने विश्वकर्माले बताएका छन् । त्यसपछि पार्थिव शरीर कांग्रेस केन्द्रीय कार्यालय सानेपामा राखिनेछ । बिहान साढे ११ बजेदेखि २ बजेसम्म श्रद्धाञ्जलीका लागि सानेपामा राखेपछि अन्त्येष्टिका लागि पशुपति आर्यघाटमा लगिने छ ।