इटहरी ।मोरङको कानेपोखरी गाउँपालिका–२ मा बसबाट लडेर मङ्गलबार एक जना वृद्ध पुरुषको मृत्यु भएको छ । रङ्गेलीबाट कानेपोखरीतर्फ आउँदै गरेको को १ ख ४१८८ नम्बरको बसबाट लडेर रङ्गेली नगरपालिका–२ का ७३ वर्षीय बलभद्र पराजुलीको मृत्यु भएको प्रदेश १ प्रहरी कार्यालय विराटनगरका प्रवक्ता एसपी नवीनराज राईले जानकारी दिए । पराजुली सोही बसका यात्रु हुन् । 

बसबाट ओर्लने क्रममा बिहान ११ बजेतिर उनी घाइते भएका थिए । उपचारका क्रममा रङ्गेली अस्पतालमा मृत्यु भएको प्रहरीले जनाएको छ । बस र चालक रतुवामाई नगरपालिका–२ का बाबुराम टुडुलाई नियन्त्रणमा लिएर प्रहरीले घटनाको अनुसन्धान थालेको छ ।