इटहरी । सुनसरी र मोरङको संगम स्थल इटहरीको बुढिगंगा जमुना मुक्ती घाटमा आगामी साउन २ गते देखि शिवगंगा महा आरती हुने भएको छ । नेपाललाइ हिन्दु राष्ट्र घोषणा गराउन सरकारलाइ दबाब स्वोरूप र पितृ उद्धारकानिमित्त सो कार्यक्रम गरिने भएको हो ।

शिव सेना नेपाल सुनसरी जिल्ला कार्य समितिले इटहरीमा पहिलो पटक पितृहरूको उद्धारका निमित्त बुढि गंगाजमुना मुक्तीघाटमा लाख बत्ती बालिनुका साथै महाआरती गरिने भएको हो । साउन महिनाको प्रत्येक सोमबार यो आरती गरिने शिव सेना नेपाल सुनसरीका अध्यक्ष हिरा आचार्यले बताउनुभयो । पितृहरूको आशिर्वाद सदैव रहिरहोस भन्ने कामना सहित पवित्र गंगास्वोरूप मुक्तिधाममा सन्ध्याकालिन महा आरतीको आयोजना गरिने जनाइएको छ । 

नेपालभरीका चर्चित साधुसन्त लगायत पुजारी र हिन्दुधर्म प्रति आश्था राख्ने शयौ भक्तजनहरूको उपस्थितीमा साउनको प्रत्येक सोमबार शिवगंगा महा आरती र पितृ उद्धारकानिमित्त लाखबत्ती बालिने आयोजक शिवसेना नेपाल सुनसरीका अध्यक्ष हिरा आचार्यले बताउनुभयो । 

इटहरीकाे बुढिगंगा मुक्तीघाटकाे बेग्लै पहिचान र इतिहास भएपनि यसकाे प्रचार हुन नसक्दा पछि परेकाे उल्लेख गर्दै साेहि कार्यक्रम मार्फत यस क्षेत्रलाइ धार्मीक पर्यटकीय क्षेत्रको रुपमा बिकास गरीने अध्यक्ष आचार्यले बताउनुभयो । मुक्तिघाटमा अन्तिम संस्कार पछि पितृहरूकाे उद्धार हाेस भन्ने कामना सहित ब्राह्मणहरुद्धारा बेद मन्त्र पाठ सहित लाख बत्ती बालिने जनाइएको छ ।  

इटहरीमै पहिलो पटक आयोजना गर्न लागिएको यस कार्यक्रमलाइ भब्य र ब्यवस्थित बनाउन शिव सेना नेपाल सुनसरीका सदस्य टिआर भुजेलको संयोजकत्वोमा आयोजक समिती बनाइएको जनाइएको छ । पछिल्लो समय धार्मिक पर्यटकिय स्थलको रूपमा स्थापित भएको बुढिगंगा जमुना मुक्ती घाटमा बिश्व शान्तीको कामना गर्दै शिवगंगा महा आरती र पितृउद्धारका निमित्त लाख बत्ती बालिने जनाइएको छ ।