काठमाडाैं । सरकारी मोटसाइकलको दुरूपयोग गरेको भिडियो खिचेर सामाजिक सञ्जालमा हालेको भन्दै मोरङको जहदा गाउँपालिकाका एक जना वडाध्यक्षले स्थानीयलाई निर्घात कुटपिट गरेको आरोप लागेको छ ।जहदा गाउँपालिका ४ का वडाध्यक्ष शिवशंकर गामीले सोही ठाउँका ४० वर्षीय स्थानीय गुरुचरण महतोलाई निर्घात कुटपिट गरेको पीडितको भनाइ छ ।

वडाध्यक्ष गामीले कुदाउने को १ ब १५८४ नम्बरको पल्सर मोटसाइकल दुरूपयोग गरि वडाध्यक्षका भतिज राहुल गामीले विदाको दिन कुदाएको भिडियो खिचेर महतोले गत शनिबार सामाजिक सञ्जालमा हालेका थिए । वडाध्यक्षको मोटसाइकल दुरूपयोग गरेको भन्दै सामाजिक संजालमा हालेको केही बेरमा भाइरल भएर वडाअध्यक्ष गामीको आलोचना भएपछि उनले कुटपिट गरेको महतोले बताए ।

‘शनिबार विदाको दिन वडाध्यक्षको भतिजाले विराटनगर सरकारी मोटसाइकल लिएर आउँदै गर्दा कटहरी बजारमा मैले भिडियो खिचेको थिएँ । उक्त भिडियो धिरज ठाकुरले सामाजिक संजालमा हालेको रहेछ । त्यसको केही बेरमा भाइरल पनि भयो,’ पीडित महतोले भने, ‘त्यसपछि वडाध्यक्षसहितको ९÷१० जनाको समूहले जहदाको रामचौकमा रहेको पेट्रोल पम्पमा आएर मलाई निर्घात कुटपिट गरेका छन् । अपशब्द बोल्दै मलाई वडाध्यक्षसहित आएकाले लात्ती, मुक्का प्रहार गरिरहे ।’

कुटपिटबाट हात, टाउको र शरीरका विभिन्न भागमा चोटपटक लागेको उनले बताए । ‘अहिले पनि वडाध्यक्षसहितका समूहरूले ज्यान मार्ने धम्की दिने गरेका छन्,’ महतोले भने, ‘मेरो ज्यानको सुरक्षाको लागि प्रशासनलाई पनि जानकारी गराएको छु ।’सरकारी गाडीको दुरूपयोग गरेको घटना उजागर गर्दा आफूमाथि कुटपिट गर्ने वडाध्यक्षसहित प्रहरीमा उजुरी पनि दिएको उनले बताए ।

‘प्रहरीमा पनि उजुरी दिएको छु,’ उनले भने, ‘तर अहिलेसम्म कुनै कारबाहीको प्रक्रिया अगाडि बढाएको छैन । ’वडाध्यक्ष गामीले आफूलाई बदनाम गराउने उद्देश्यले केही समूह लागि परेको बताए । सामान्य भनाभन मात्र भएकोले आफुले कसैलाई पनि कुटपिट नगरेको गामीको भनाइ छ । ‘चुनावमा हारेको रिस फेर्न केही समूह लागिपरेका छन्,’ वडाअध्यक्ष गामीले भने ।