इटहरी । प्रदेश १ सरकारले विराटनगरभन्दा बाहिर राजधानी सार्ने प्रयास गरेको विराटनगर महानगर मेयर नागेश कोइरालाले आरोप लगाएका छन् । प्रदेशका स्थायी संरचना निर्माण गर्नका लागि प्रदेश सरकारले जग्गा खोजी रहेको बेला उनले यस्तो आरोप लगाएका हुन् ।

विराटनगर बाहिर जग्गाको खोजीमा प्रदेशका केही मन्त्री लागेकोसमेत मेयर कोइरालाले आरोप लगाएका छन् । महानगरपालिकालाई जग्गा उपलब्ध गराउन भनेर पत्र पठाएको १ घण्टा भित्रमा कार्यपालिकाको बैठक राखेर जग्गा उपलब्ध गराउने मेयर कोइरालाको भनाइ छ । ‘विराटनगर बाहिर राजधानी सार्ने प्रयास हुन थालेको छ,’उनले भने ‘राजधानीका लागि महानगरले जति पनि जग्गा दिन सक्छ तर प्रदेश सरकारले महानगरसँग जग्गाको विषयमा खोजी नै गरेको छैन ।’

आन्तरिक मामिला तथा कानुन मन्त्री केदार कार्कीको संयोजकत्वमा रहेको जग्गा खोजी समिति बनेको छ । समितिले विराटनगर महानगरपालिका, इटहरी उपमहानगरपालिका, सुन्दरहरैंचा नगरपालिका, बुढीगंगा, कटहरी र ग्रामथान गाउँपालिकाका क्षेत्रमा भएका सरकारी जग्गाको खोजी गर्न थालेको छ । सरकारले बनाएको समितिमा विराटनगर महानगर प्रमुख कोइराला, बुढीगंगा गाउँपालिका अध्यक्ष जितेन्द्र थापा मगर, ग्रामथान गाउँपालिका अध्यक्ष जयप्रकाश गच्छदार,सुन्दरहरैंचाका मेयर केदारप्रसाद गुरागाईँ, इटहरीका मेयर हेमकर्ण पौडेल रहेका छन् ।

प्रदेश सरकारले इटहरी, विराटनगर, बुढीगंगा, ग्रामथान र सुन्दरहरैंचा आसपास नै आफ्ना संरचना बनाउने तयारी गर्दै जग्गा व्यवस्थापन गर्न तयारी गरिरहेको छ । विराटनगर महानगरको स्वामित्वमा रहेको बुढीगंगाको २२ बिघा जग्गालाई समेत प्रयोग गर्न सकिन्छ भनी छलफल अगाडि बढाएपछि मेयर कोइराला असन्तुष्ट हुँदै आएका छन् ।

प्रदेश सरकारले जग्गा उपलब्ध गराउन निवेदन दिए महानगरले सहजै जग्गा उपलब्ध गराउने उनले बताए । राजधानीको संरचना बनाउनका लागि जग्गाको खोजी मात्रै भइरहेको मन्त्री केदार कार्कीले बताए । उनले बृहत विराट क्षेत्र भित्र पर्ने स्थानीय तहमा जग्गाको खोजी भइरहेको बताए । प्रदेश सरकारले विराटनगरलाई प्रदेशको राजधानी घोषणा गरे पनि अहिलेसम्म स्थायी संरचना भने बनाउन सकेको छैन ।