इटहरी: सुनसरीको इटहरी उपमहानगरपालिकामा स्थानीय तह सदस्य निर्वाचनको मतगणना जारी छ ।

हालसम्म ३० हजार दुई सय ४४ मतको गणना सम्पन्न भएको निर्वाचन अधिकृतको कार्यालय इटहरीले जनाएको छ । कार्यालयका अनुसार हालसम्म बाम लोकतान्त्रिक गठबन्धनको तर्फबाट मेयरका उम्मेदवार बनेका नेपाली कांग्रेसका नगर सभापति हेमकर्ण पौडेल १३ हजार सात सय ७९ मतका साथ अग्रस्थानमा रहेका छन् । उनका निकटतम प्रतिद्वन्द्वी

नेकपा एमालेका यामकुमार सुब्बाको ११ हजार पाँच सय ६५ मतका साथ पौडेललाई पछ्याइरहेका छन् । यस्तै, राष्ट्रिय प्रजातन्त्र पार्टी (राप्रपा) बाट मेयर पदमा उम्मेदवारी दिएका आकाश सुब्बा एक हजार तीन सय २० मतका साथ तेस्रो स्थानमा रहेका छन् । उपमेयरतर्फ नेकपा एमालेकी संगीता चौधरी १२ हजार नौ सय ९४ मतका साथ अग्रस्थानमा रहँदा उनका निकटतम प्रतिद्वन्द्वी बाम लोकतान्त्रिक गठबन्धनका तर्फबाट उम्मेदवार बनेका नेकपा एकीकृत समाजवादीका केन्द्रीय सदस्य केशवकुमार विष्ट आठ हजार दुई सय नौ मतका साथ सङ्गीतालाई पछ्याइरहेका छन् । यस्तै, राप्रपाबाट उपमेयर पदमा उम्मेदवार रहेकी वविता चौधरीको एक हजार सात सय ५२ मत आएको छ ।