इटहरीः इलामको रोङ गाउँपालिका १ मा नेपाली कांग्रेसका उम्मेदवार आफ्नै भाइलाई पराजित गरी वडाध्यक्षमा निर्वाचित भएका छन् ।

मनोहरी खड्का आफ्ना भाइ नेकपा एमालेका उम्मेदवार मनोज खड्कालाई पराजित गरी वडाध्यक्ष बनेका हुन् । आफ्ना निकटतम प्रतिद्वन्द्वीका रुपमा प्रतिस्पर्धामा रहेका मनोजलाई दाजु मनोहरीले चार सय ८८ का विरुद्ध ६ सय १० मत ल्याई पराजित गरेका हुन् । उनीहरुबीच दुई सय १२ मतको अन्तर छ ।

सो वडामा दलित महिलातर्फ एमालेकी लक्ष्मी नेपाली, महिलामा कांग्रेसका मनमाया राई, खुल्लामा कांग्रेसकै रेशबहादुर राई र हेमु थापा निर्वाचित भएका छन् । वडाको मतगणना सकिदा गाउँपालिका अध्यक्षमा नेपाली कांग्रेसका उम्मेदवार सुवास तामाङले २१३ मतको अग्रता बनाएका छन् ।

एमालेको मेहरमान तामाङले ४८४ मत ल्याउदा नेपाली कांग्रेसका सुवास तामाङले ६९७ मत पाएका हुन् । उपाध्यक्षमा पनि कांग्रेसको अग्रता छ । एमालेको उम्मेदवार विष्णु खवासभन्दा कांग्रेसकी कल्पना खनाल भण्डारीले ५१ मत बढी पाएकी छन् । कल्पनाले ६११ मत पाउँदा विष्णुले ५६० मत पाएका छन् ।