इटहरीः सुनसरीको इटहरी उपमहानगरपालिकामा स्थानीय तह सदस्य निर्वाचनको मतगणना जारी छ ।

पछिल्लो मतपरिणामअनुसार चार हजार नौ सय ७८ मत गणना हुँदा मेयर पदमा बाम लोकतान्त्रिक गठबन्धनका तर्फबाट उम्मेदवारी दिएका नेपाली कांग्रेस नगर सभापति हेमकर्ण पौडेल चार हजार नौ सय ७८ मतका साथ अग्रस्थानमा रहेका छन् । उनका निकटतम प्रतिद्वन्द्वी नेकपा एमालेका उम्मेदवार यामकुमार सुब्बा एक हजार आठ सय २५ मतका साथ पौडेललाई पछ्याइरहेका छन् ।

यसैगरी, उपमेयरमा एमालेकी उम्मेदवार सङ्गीता चौधरी १९६५ मतका साथ अग्रस्थानमा रहेकी छन् । गठबन्धनका तर्फबाट उम्मेदवारी दिएका नेकपा एकीकृत समाजवादीका केन्द्रीय सदस्य केशवकुमार बिष्ट एक हजार पाँच सय १७ मतका साथ चौधरीलाई पछ्याइरहेका छन् । केही स्वतन्त्र उम्मेदवारहरुसहित इटहरीको मेयर पदमा कुल १६ जना आकांक्षीहरु प्रतिस्पर्धामा रहेका छन् ।

वैशाख ३० गते सम्पन्न मतदानमा इटहरीका २० वटै वडाका जम्मा एक लाख चार हजार ६ सय २६ मतदातामध्ये ७३ हजार सात सय ३२ जनाले मतदान गरेका थिए । यो संख्या कुल मतदाता संख्याको ७०.४७ प्रतिशत हो । अर्थात् इटहरी उपमहानगरमा ७०.४७ प्रतिशत मत खसेको छ ।