इटहरीः नेकपा एमालेको गढ मानिएको रामधुनी नगरपालिका वडा नम्बर ९ मा नेकपा एकीकृत समाजवादीको तर्फबाट घनश्याम चौधरीले गतिलो दावेदारी प्रस्तुत गरेका छन् ।

२०७४ सालको स्थानीय निकाय निर्वाचनमा नेकपा एमालेबाट निर्वाचित भएर पाँच बर्षे वडा अध्यक्षको कार्यकाल सम्हाली सकेका घनश्यामले यसपाला भने नेकपा एकीकृत समाजवादीबाट वडा अध्यक्षको उम्मेद्वारी दिएका हुन् ।

एक कार्यकाल वडा अध्यक्ष भइसकेको व्यक्ति तपाईको पुनः उम्मेद्वारी किन भन्ने प्रश्नमा घनश्याम जनताको सपना पुरा गर्न आफुले पुनः वडा अध्यक्षमा उम्मेद्वारी दिएको बताउँछन् । आफुले पाँच बर्ष गरेको कामबाट प्रभावित भएर नै जनता स्वतह स्फुर्त रुपमा आफ्नो पक्षमा रहेको चौधरीको दावी छ ।

इमानदारीता पुर्वक पाँच बर्षे कार्यकाल विताएको र भ्रष्ट्राचारमा शुन्य सहनसिलता देखाएको भएर पनि जनताले आफुलाई चाहिरहेको उनले प्रदेश पोर्टलसँग बताए । प्रदेश सरकार तथा केन्द्रिय सरकारसँग बजेटको पहल गरेर भएपनि विकास निर्माण र पुर्वाधारका कामहरु आफुले गरेको बताउने चौधरी पुन वडा अध्यक्षमा जित हासिल गर्न पाए रामधुनी ९ का जनताका बाँकी रहेका सपना साकार बनाउने आफ्नो उदेश्य रहेको बताउँछन् । जनविश्वास र जनाधार नै आफ्नो जित्ने आधार रहेको चौधरीले प्रदेश पोर्टललाई बताए ।

नेकपा एमालेबाट टिकटको आकांक्षी रहेका चौधरी यताबाट टिकट नपाउने पक्का भएपछि नेकपा एसतिर प्रवेश गरेको बताइन्छ तथापी उनको पक्षमा जनलहर राम्रो भएको त्यहाँको माहौल नियालिरहेकाहरुको भनाई छ ।

शनिवार भएको नेकपा एसको चुनावी सभामा रामधुनी ९ कलममय बनेको थियो । हजार भन्दा बढिको संख्यामा भेला भएका जनताले घनश्याम र कलमको पक्षमा दिनभर नाराबाजी गर्यो ।

अघिल्लो कार्यकालमा लोकप्रियता कमाएकै कारण त्यहाँको जनलहर घनश्यामलाई नै वडाअध्यक्षको रुपमा ल्याउने पक्षमा रहेको बुझिएको छ । घनश्यामले खुल्ला सदस्यमा दिप बहादुर कार्की ,भिमा थापा घिमिरे, महिला सदस्यमा लाल कुमारी चौधरी र दलित महिला सदस्यमा सरिता सदा सहितको प्यानल वडा नम्बर ९ को चुनावी मैदानमा उत्रिएको छ ।

चौधरीसँगको प्रतिस्पर्धामा रामधुनी ९ मा ८ पार्टीबाट ८ जना नै प्रतिस्पर्धामा उत्रिएका छन् । वडा नम्बर ९ मा विशेषत नेपाली कांग्रेस, नेकपा एमाले र नेकपा एकीकृत समाजवादी विच तिव्र प्रतिस्पर्धा हुने देखिन्छ । तथापि नेकपा माओवादी केन्द्र, राप्रपा, जनता समाजवादी पार्टी, लोकतान्त्रिक समाजवादी पार्टी र नेपाल लोकतान्त्रिक पार्टीले समेत उम्मेद्वारी दिएका छन् ।