इटहरीः नेकपा (एमाले) बेलाबारीले स्थानीय तह निर्वाचनमा आफू विजयी भए नगरका लागि गर्ने कामहरु समेटेर प्रतिबद्धतापत्र सार्वजनिक गरेको छ । बेलबारी नगरपालिकाको प्रमुख पदका उमेदवार डिबी राईले प्रतिबद्धतापत्र सार्वजनिक गरेका हुन् । आफूलाई विजयी गराए नगरलाई समृद्ध बनाउने उनको भनाइ छ ।

उनले सार्वजनिक गरेको प्रतिबद्धतापत्रमा बेलबारीलाई सफा, सुन्दर र हरियाली नगर बनाउने उल्लेख छ । नीति, कानुन र योजना कार्यान्वयन आफ्नो प्राथमिकतामा पर्ने उनले बताएका छन् ।

शिक्षा, स्वास्थ्य, सडक यातायात, ढल निकास, कृषिको विकास, वन तथा वातावरण संरक्षण, सामाजिक सुरक्षालगायत आधारभूत पूर्वाधारको विकासमा केन्द्रित रहेर काम गर्ने प्रतिबद्धता पनि राईले व्यक्त गरेका छन् ।

पर्यटन नगरीका रूपमा बेलबारीको विकास गरिने उनको प्रतिबद्धता छ । बहुसांस्कृतिक संग्रहालय निर्माण गरिनेलगायत विषयले पनि प्रतिबद्धतापत्रमा स्थान पाएको छ ।