बलात्कारको उजुरी गर्न गएकी बालिका प्रहरीबाटै बलात्कृत !महिला तथा बालिकामाथि हुने यौन हिंसा विरुद्ध भारतीय सहरहरूमा विरोध प्रदर्शन भएका छन् ।

नयाँ दिल्ली । एक १३ वर्षीया नाबालिकाले आफूमाथि बलात्कार गरेको अभियोग लगाएपछि उत्तरी भारतीय राज्य उत्तर प्रदेशका एकजना प्रहरी फरार भएका छन् ।

आफूमाथि सामूहिक बलात्कार भएको उजुरी गर्न गएकी बालिकामाथि ती प्रहरीले उल्टै बलात्कार गरेको बताइएको छ । एक वरिष्ठ प्रहरी अधिकारीले नाम नखुलाइएका ती प्रहरीलाई जागिरबाट निलम्बन गरेर आपराधिक मुद्दा दायर गरिएको बताएका छन् ।

ती किशोरीले गत महिना आफूमाथि चारजना पुरुषले सामूहिक बलात्कार गरेको बताएकी छन् ।

यस घटनालाई लिएर भारतमा थुप्रै मानिसले सामाजिक सञ्जालमार्फत आक्रोश पोखिरहेका छन् ।

पीडित बालिकाका पिताले प्रहरीमा दर्ता गराएको उजुरीमा उल्लेख गरिएको छ, “चारजना पुरुषले मेरी छोरीलाई छिमेकी राज्य मध्य प्रदेशमा लगेर चार दिनसम्म यौन उत्पीडन गरेका थिए । उत्तर प्रदेशको ललितपुर जिल्लामा रहेको गाउँमा छाडेर उनीहरू भागेका थिए ।”

एनडीटीभी च्यानलका अनुसार भोलिपल्ट उनी आफ्नी काकीसँग स्थानीय प्रहरी चौकीमा उजुरी गर्न गएकी थिइन् ।

कंग्रेसकी वरिष्ठ नेता प्रियंका गान्धी भद्राले हिन्दी भाषामा ट्विट गर्दै प्रश्न गरेकी छन्, “महिलाका लागि प्रहरी चौकीहरू नै सुरक्षित छैनन् भने उनीहरू उजुरी गर्न कहाँ जाने ?”

-बीबीसीबाट