सुन्दरहरैंचाः स्थानीय तहको निर्वाचनको माहोल बनेसँगै नेकपा एकीकृत समाजवादीका नेताहरु नेकपा एमालेमा फर्किन थालेका छन् ।आज सुन्दरहरैंचा नगरपालिकाको वडा नम्बर ६ मा आयोजित घरदैलो कार्यक्रममा नेकपा एकीकृत समाजवादीका नेता कार्यकर्ताहरु खुलेर एमालेको घरदैलो कार्यक्रममा सहभागी भएका हुन् ।

ठूलो संख्यामा रहेका एकीकृत समाजवादीका समर्थकहरु खुलेर नआए पनि सूर्यमा छाप हान्न तयार देखिएका छन् । केही नेताहरु एमालेमा फर्किएका छन् भने केही फर्कने तयारीमा छन् । एकीकृत समाजवादी पार्टीको जिल्ला कमिटी सचिवालय सदस्य नरेन्द्र बस्नेत एमालेमा फर्किएका हुन् । त्यस्तै, जिल्ला कमिटी सदस्य नगेन्द्र सुवेदी, लक्ष्मी खतिवडा तथा नगर कमिटी सदस्य दलबहादुर निरौला एकीकृत समाजवादी त्याग गरी पुरानै पार्टी नेकपा एमालेमा फर्किएका हुन् । उनीहरु सबै वडा नम्बर ६ को घरदैलोमा सक्रिय रुपमा सहभागी हुँदै एमालेमा फर्किएको बताएका हुन् ।

उनीहरुका अनुसार एकीकृत समाजवादीका जिल्लास्तरका धेरै नेता नै एमालेमा आउन इच्छुक छन् । उनीहरुले एमालेका नेतासँग केही चरणको वार्ता गरिसकेका छन् । केही चरणको बैठक सम्पन्न भएपछि ठूलो संख्यामा एकीकृत समाजवादीका नेता तथा कार्यकर्ता एमालेमा फर्किने भएका हुन् । एकीकृत समाजवादी कम्युनिष्ट पार्टी नै सिध्याउने खेलमा लागेकाले आफूहरु एमालेमै फर्कन चाहेको उनीहरुको भनाइ छ ।